Өнөөдөр Иракийн нийслэл Багдад болон Киркук, Самарра хотуудад террорист халдлага болж, наад зах нь 23 хүн амь үрэгдсэн гэж РИА Новости мэдээлэв.

Багдад хотод дөрвөн удаагийн дэлбэрэлт болсон бөгөөд тэсрэх бөмбөг хотын дөрвөн өөр дүүрэгт дэлбэрсэн гэнэ. Дэлбэрэлт болсон Амил (Amil), Кадимия (Kadhimiya), Палестин Стрит болон Заафарания (Zaafaraniya) дүүргүүдэд мусульман шиитүүд олноор амьдардаг юм байна. Харин террористуудын бөмбөгөнд ажилчид болон хамгаалалтын албаныхан өртсөн ажээ. Эдгээр дүүргүүдэд амь эрсэдсэн хүний тоо 11 хүрсэн аж.

Киркук хотод есөн хүн, Самарра хотод гурван хүн амиа алдсан бөгөөд Баакуба хотод мөн дэлбэрэлт болсон гэсэн мэдээ байна. Гэхдээ Баакуба хотод болсон дэлбэрэлтийн талаар тодорхой мэдээлэл ирээгүй байгаа юм.

Өнгөрсөн гуравдугаар сард Иракт террористууд мөн халдлага үйлдэж байсан бөгөөд Байджи, Самарра, Эль-Латифия, Хилла, Махмудия болон өөр хотуудад тэсрэх бөмбөг дэлбэлсэн юм. Энэ үеэр 50 орчим хүн амь үрэгдэж, 200 хүн шархадсан байна.

Иракт шашны суннит болон шиит бүлэглэлийн хоорондын дайсагнал нэмэгдсэн нь тайван бус байдлыг бий болгосон юм. 1997 оны байдлаар Иракийн хүн амын 66 хувь нь мусульман-суннитууд, 34 хувь нь шиитүүд  байжээ.

Саддам Хусейны засаглалын үед суннитууд Иракийн Засаг захиргаанд удирдах алба олноор хашдаг байсан бөгөөд 2003 онд АНУ Иракт цөмрөн орсны дараа Саддам Хусейн эрх мэдлээ алдсан билээ. Ингээд шиитүүд суннитуудыг хавчиж эхэлснээс гадна улсын чухал албан тушаалд ажиллаж эхэлсэн гэнэ. Тэр тусмаа улс оронд хамгийн их нөлөө бүхий ерөнхий сайдын суудалд шиитүүдийн нэг нь суусан байна.

Одоо шашны энэ хоёр бүлэглэл бие биеийнхээ эсрэг террорист халдлага үйлдсээр байгаа бөгөөд улс төрийн ажиглагчдын хэлж байгаагаар энэ байдал нь цаашид эмх замбараагүй байдал тэр ч бүү хэл иргэний дайн үүсгэж магадгүй байгаа аж.