“А” хэсгээс одоогийн байдлаар Увс аймгийн “Увс нуур” дэвжээ хоёр дэвжээг амжилттай буулгаж аваад байна. Тэр дундаа бар жилийн тэргүүн дэвжээгээр шалгарсан “Хантайшир”-ыг илт давамгайлж /24:12/ ялсан нь энэ жилийн “нутгаа дуурсгана” барилдааны эхний дуулиан байлаа. Улсын харцага Ө.Бат-Оршихоор ахлуулсан энэ багт аймгийн хурц арслан О.Гантулга, аймгийн арслан П.Бүрэнтөгс, Н.Батсуурь,  аймгийн заан Б.Ганзориг, Т.Баасанхүү аймгийн начин Л.Цээсүрэн нарын “шижгэнэсэн залуус” багтсан. Сүүлийн үед болж буй барилдаануудад том цолтой бөхчүүдийн “эрлэг” болсон тэднийг бөх сонирхогчид андахгүй мэддэг болжээ. Тэд эхний хоёр барилдааны дараагаар хамгийн олон буюу 59 даваа авсан байна. Тэгвэл улсын харцага Л.Пүрэвжаваар ахлуулсан Дундговь аймгийн “Түшээт ханы аварга” дэвжээ мөн л хоёр дараалан ялснаар зургаан оноотой болжээ. Харин энэ хэсгийн гол өрсөлдөгч нарын нэг “Хантайшир”-ынхан “Хан Хэнтийн аварга” дэвжээг ялснаар алдаагаа засч гурван оноотой болов. Тэгвэл “Бес богда бүргэд”, “Ажнай” дэвжээд хоёр удаа ялагдсанаар оноо авч чадсангүй. Гэхдээ тэдэнд дараагийн хэсгийн барилдаануудад амжилттай барилдан оноогоо нөхөж авах боломж нээлттэй буй.  

“Б” хэсэгт Архангай аймгийн “Бөхбилэгт” дэвжээ Завханыг 22:14-өөр, Дорнодыг 26:10-аар буулган авсан. Харин “Хөвсгөлийн хүчтэнүүд” Ховдыг 22:14-өөр, Булганыг 21:15-аар ялснаар адилхан зургаан оноотойгоор хэсгээ тэргүүлж байна. Дараагийн барилдаанд “Бөхбилэгт”-ийнхэн “Ховд” дэвжээний бөхчүүдтэй хүч үзэх ба Архангайн багт заан Д.Рагчаа, Ч.Санжаадамба, харцага Т.Мөнгөнцоож, аймгийн хурц арслан Р.Пүрэвдагва, аймгийн арслан Н.Адъяабат зэрэг шилдгүүд багтсан бол “Ховд” дэвжээ харцага Т.Амартүвшин, начин Ц.Лхагвасүрэн, Н.Батзаяа, аймгийн арслан Б.Пүрэвсайхан нарын “элдэвтэй нөхдүүд”-ээр багаа бүрдүүлсэн байгаа. Тэд хэрхэн барилдахыг таашгүй.  Хэрвээ “Бөхбилэгт” ялбал тэргүүлэгчийн байр сууриа хадгалж, шигшээд гарах магадлалаа батална. “Ховд”-ынхон ялваас “Хөвсгөлийн хүчтэн”-д алдсан гурван оноогоо нөхөж, цаашлаад тэргүүлэгчдийн эгнээ рүү шилжих боломжтой болно гэсэн үг. Харин зургаан оноогоо халаасалчихсан байгаа “Хөвсгөлийн хүчтэнүүд” дараагийн тойрогт Дорнод нутгийн бөхчүүдтэй хүч үзнэ. Энэ хэсгийн хамгийн хүчтэй дэвжээгээр “Бөхбилэгт”, “Хөвсгөлийн хүчтэнүүд”-ийг үзэгчид нэрлэж буй бөгөөд тэд хэсгийн барилдааны хамгийн сүүлийн өдөр буюу 28-нд хоорондоо хүч үзэх нь ээ. Харин анхдугаар барилдааны дэд аварга Булганыхан энэ жил нэлээд сулхан бүрэлдэхүүнтэй байгаа учир амжилт нь ч буурах магадлал байна.

“В” хэсгийн багуудыг “Их Монголын хүчтэнүүд” тэргүүлж явна. Харин тэдний гол өрсөлдөгч Сэлэнгийн “Таван хан” дэвжээнийхэн эхний барилдаанд өнжсөн учир гурван оноотой байгаа. Бар жилд гуравдугаар байр эзэлсэн тэднийг дахиад дээгүүр барилдах болов уу гэсэн таамаглал бий. Улсын арслан Г.Эрхэмбаяраар хүч нэмэгдүүлсэн тэд гол өрсөлдөгчөө нэхэхээр “морио” эмээлэлжээ. Хамгийн сонирхолтой барилдаан Өвөрхангай, Сэлэнгийн дэвжээдийн хооронд болно. Арслан цолтнуудаар магнайлуулсан тэдний барилдаан тэнцүүхэн өрнөх болов уу. Хоёр жилийн өмнө болсон Бар жилийн тэргүүн дэвжээ тодруулах барилдаанд энэ хоёр дэвжээ мөн л нэг хэсэгт сугалаа татаж 21:15-аар “Их монголын хүчтэн” ялж байсан удаатай. Тухайн үед барилдсан багийн бүрэлдэхүүнд нэг их өөрчлөлт ороогүй гэж болно. Харин “Таван хан”-ыг тухайн үед начингууд ахалж байсан бол энэ удаа арслан, харцага цолтноор магнайлуулснаар сэтгэл зүйн хувьд давуу байж болох юм. Тиймээс энэ удаа даагаа нэхэх боломж гарч ирлээ. Гэхдээ “Их монголын хүчтэнүүд” тун жигд, хүчтэй баг гэдгийг мартаж болохгүй. Хэн нь ялахыг 21-ний бямба гаригт харах үлдлээ. Хэн ялсан нь бараг л хэсгээ тэргүүлнэ.