Хятадын эдийн засгийн өсөлт энэ оны эхний улиралд 8.5 хувьтай байна гэж олон улсын санхүүгийн судалгааны байгууллагууд таамаглаж байсан ч тус улсын Засгийн газар 8.1 хувьтай гарсныг өнгөрсөн баасан гаригт мэдээлсэн байна. Дэлхийн зэсийн эрэлтийн 40 гаруй хувийг бүрдүүлдэг Хятад улсын эдийн засгийн үзүүлэлт буурсантай зэрэгцэн Нью-Йоркийн бирж болон Лондоны металын биржид зэсийн үнэ 8000 ам.доллар/тонн-оос доош оржээ. Энэ өдөр зэсийн үнэ 2.8 хувиар буурч, 7990 ам.доллар/тонн-д хүрсэн бол өнгөрсөн даваа гаригт 7885 ам.доллар/тонн болж буурсан юм. Өнөөдрийн байдлаар зэсийн гурван сарын гэрээт үнэ ялимгүй өсч 8020 ам.доллар/тонн болоод байна.

Эрдсийн түүхий эдийн судалгааны байгууллага GFMS-ийн үзэж буйгаар энэ жил дэлхийн зах зээл дэх зэсийн дундаж үнэ 8475 ам.доллар/тонн байх төлөвтэй байна. Хэдийгээр энэ оны эхний хагаст зэсийн эрэлт буурах таамгаар эл металын үнэ буурах ч оны хоёрдугаар хагаст ханш нь чангарч 9000 ам.доллар/тонн-д хүрэх магадлалтай ажээ. Энэхүү таамгаа GFMS оны сүүлээр эрэлт нэмэгдэхээс гадна улс орнуудын Засгийн газар эдийн засгийг идэвхжүүлэх хүрээнд хөрөнгө гаргахтай холбон тайлбарлажээ.

Өнгөрсөн жилийн байдлаар зэсийн зах зээлд нийлүүлэлт эрэлтээсээ 256 мянган тонноор бага байжээ. Энэ жилийн хувьд нийлүүлэлт харьцангуй ихэсч байгаа ч мөн л эрэлтээсээ дутах шинжтэй байна гэж GFMS үзжээ.

Хятад улсын эдийн засгийн өсөлт энэ жил 8.5 хувьтай байна гэж томоохон банк санхүүгийн байгууллага тооцож байгаа ч, тус улсын Засгийн газар уг үзүүлэлтийг 7.5 хувь гэж зарласан нь ихээхэн зөрүүтэй байгаа юм.

Б.Төгс

www.mongolianminingjournal.com
www.journalism.mn