УИХ-ын Хууль зүйн байнгын хорооны хуралдаан болж, Хүний эрхийн үндэсний комиссын тухай хуульд нэмэлт өөрчлөлт оруулах тухай, Хүүхдийн эрхийг хамгаалах тухай хуульд нэмэлт, өөрчлөлт оруулах тухай хуулийн төслийг хэлэлцээд олонхийн саналаар “Хэлэлцэх нь зүйтэй” хэмээн үзлээ. Засгийн газраас өргөн мэдүүлсэн дээрх төсөлд зааснаар Хүний эрхийн үндэсний комиссын гишүүдийн тоог хоёроор нэмэгдүүлж байна. Тодруулбал, нэг гишүүнийг нь Хүүхдийн төлөө үндэсний төвөөс, нөгөөг нь Жендэрийн үндэсний хорооноос санал болгох аж. Ингэж хоёр гишүүнийг шинээр нэмэх болсон нь Хүний эрхийн үндэсний комисст хүүхдийн эрх мөн эмэгтэйчүүдийн эрх зөрчигдсөн гомдол ихээр ирж байгаатай холбоотой аж. Харин Хүний эрхийн үндэсний комисс нь одоо гурван гишүүнтэй нэгийг нь Ерөнхийлөгч, нөгөөг нь Улсын Дээд шүүхээс, гурав дахийг нь УИХ-ын дарга санал болгож УИХ-аар баталдаг байна. Хуульд зааснаар зургаан жилийн хугацаатайгаар томилогддог ажээ.

Хэлэлцүүлгийн шатанд гишүүд салбар хариуцсан гишүүний тоог нэмэгдүүлэх нь зөв гэж байлаа. Мөн УИХ-ын гишүүн Х.Тэмүүжин “Хүний эрхийн үндэсний комисст хяналт шалгалт явуулдаг, мөрдлөг явуулдаг эрхийг олгох ёстой. Ингэж байж гэмээнэ илэрдэггүй хэргүүдийг илрүүлэхэд илүү дөхөм болно гэж үзсэн юм. Тухайлбал, цагдаагийн байгууллага дотор гарсан хэрэг илэрдэггүй, түүнд хүний эрхийн зөрчил маш их явагдсан байдаг гэж байв. Харин УИХ-ын гишүүн Л.Болдыг Батлан хамгаалахын сайдын алба хашиж байх хугацаанд ажиглагдсан нэг асуудал нь цэргүүдийн дунд бас хүний эрхийн зөрчил багагүй байдаг. Хэдийгээр хууль хяналтын байгууллагынхан очиж ажилладаг ч тэдгээрийн дарга нь цэргийн ангийнх нь даргатай уулздаг, нэг бол даргынх нь дэргэд цэрэгтэй нь уулздаг. Энэ тохиолдолд цэргийн ангиудад гардаг хүний эрхийн зөрчил илрэх боломжгүй байгаа тул бусад улс орнуудын Хүний эрхийн үндэсний комиссынхны арга туршлагаас суралцаж тэр чиглэлээр ажиллах шаардлага байна гэсэн саналыг хэлсэн  юм. Ингээд эл төслийг “Хэлэлцэх нь зүйтэй” гэж үзэн УИХ-ын чуулганы нэгдсэн хуралдаанаар хэлэлцүүлэхээр болж тогтов.