Авлигатай тэмцэх газрын дэргэдэх Олон нийтийн зөвлөл ерөнхийлөгч асан, МАХН-ын дарга Н.Энхбаярын баривчилгаатай холбогдуулан сэтгүүлчдэд мэдээлэл хийлээ. Хуралд АТГ-ын Олон нийтийн зөвлөлийн дарга Д.Сүхбаатар, Олон нийттэй харьцах дэд зөвлөлийн дарга Т.Хасбаатар мөн Ц.Энхцэнгэл, Г.Даваахүү, Р.Батсайхан зэрэг тус зөвлөлийн гишүүд оролцов. Энэхүү зөвлөл нь хуульд заасны дагуу авлигатай тэмцэхэд олон нийтийг идэвхитэй оролцуулах, тэдний санал бодлыг хүргэх, авлигын нөхцөл байдал, авлигын эсрэг хууль тогтоомжийн хэрэгжилтийн талаар ухуулан таниулах, авлигаас ангид нийгмийн орчин бий болгох гэх мэт зорилготой юм байна.

АТГ-ын Олон нийтийн зөвлөлөөс  энэ сарын 13-нд сэжигтэн Н.Энхбаярыг Эрүүгийн хуулийн тусгай ангийн 150 дугаар зүйлийн 150.3-д заасанаар сэжигтэнээр тооцон Сүхбаатар дүүргийн шүүхийн захирамжийг биелүүлж цагдан хорих, таслан сэргийлэх арга хэмжээг авахдаа АТГ-ын ажилтнууд хуулийн дагуу ажилласныг мэдэгдсэн юм. Тэд “МАХН-ын дарга Н.Энхбаярыг төрийн өндөр албан тушаал хашиж байх үед нь газрын наймаа цэцэглэн, ашигт малтмалын лицензийн 70 хувь олгогдож, уул уурхай дахь хууль бус үйлдэл дээд цэгтээ хүрсэн. Түүнчлэн Н.Энхбаяр нь өөрийгөө хамгаалах улс төрийн нам байгуулж, олон нийтэд нэг талыг барьсан тэнцвэргүй мэдээлэл өгч буй ТВ-9 телевизийг хувьдаа завшсан” хэмээн мэдэгдээд ТВ-9 телевизийн үйл ажиллагааг зогсоохыг хүсч байгаагаа ярьсан юм. Тус зөвлөл нь Авлигатай тэмцэх газрын өмнөх удирдлагуудаас авлигач төрийн өндөр албан тушаалтнуудыг шалгахыг удаа дараа шаардаж байсан ч үр дүнд хүрээгүй ажээ.