Хуш модыг хамгаалах таван хүний бүрэлдэхүүнтэй олон талт зөвлөлийг Байгаль орчин, аялал жуулчлалын яамнаас байгууллаа. Урин дулаан цаг ирж буй энэ үед ногоон байгууламжийг хамгаалах болон ой модны зохист ажиллагааг дэмжих зайлшгүй шаардлага гардаг. Энэ асуудлыг шийдэхээр Байгаль орчин, аялал жуулчлалын яамны харьяа Ойн газар, Монголын байгаль орчныг хамгаалах хуульчдын холбоо, Улсын мөрдөн байцаах газар, ШУА-ийн Ботаникийн хүрээлэн, Монголын байгаль орчны иргэний зөвлөл, Монголын самар үйлдвэрлэгчдийн холбоо, “Green SOS”, “Монгол Улсын Аюулгүй байдлын төлөө зүтгэе”, Сэлэнгэ-Монгол шим ногоон эрүүл төв” ТББ зэрэг төрийн байгууллага болоод иргэний нийгмийн төлөөллүүд дөрөвдүгээр сарын 11-нд цуглан, энэ талаар хэлэлцсэн байна.

Энэ хүрээнд хуш модон ойг хамгаалах, самрын зохист хэрэглээг хянаж, зохицуулахын тулд зөвлөл байгуулахаар болсон ба одоогоор шалгахаар хураагаад байгаа 100 гаруй тонн самрыг хөгцөрч муудаж, болон урдын адил устгал нэрээр худалдан борлуулахаас сэргийлэхийн тулд микробиологийн дүгнэлт гаргуулах гэнэ. Түүнчлэн эрх зүйн орчны тухайд, ойн шинэчлэн баталж байгаа хуулийн 29.1.1 ба бусад заалтуудад хуш модны асуудлыг яаралтай тусгах тухай саналыг төрийн болон иргэний нийгмийн байгууллагын  төлөөллүүд холбогдох яам, агентлагт  хүргүүлэх ажээ.

Манай оронд дэлхийн хуш модны нөөцийн 1,8 хувь буюу 683,9 мянган га талбай бүхий хушин ой нь Архангай, Баян-Өлгий, Булган, Төв, Завхан, Хэнтий, Увс, Сэлэнгэ, Өвөрхангай, Хөвсгөл аймаг, Улаанбаатар хотын ногоон бүсэд тархан ургаж байна.