Агч Ерөнхийлөгчийг ба­ривчлах
ажиллагаанд санаатай, бас санамсаргүй байдлаар өрт­сөн УИХ-ын дөрвөн
гишүүн тун ууртай байна. Уранхай ноо­сон малгай дарж өмссөн, цагдаа ч юм
уу, зандалчин ч юм уу баахан залуучууд тэдний хоё­рыг нь “эвхээд” диван
доогуур чихчихсэн, нэгийг нь нам цохиод унагачихсан болохоор аргагүй
байх л даа. Бухимдахдаа бүр нэг нь гаж үйлдэл хийчихсэн чинь
Ш.Сайхансамбуу гишүүний араас “Салаавч ¹2” гэсэн шинэ хочтой болж
хоцорлоо. Н.Энхбаяртай “сүүлчийн мөч” хүртэл эрийн жудаг зааж хамт
байсан гавьяат үйлсийн эздээс ялангуяа Ч.Улаан гишүүн нүдний шилээ
хагалуулж, хэнд нь ч юм элэгдүүлсэндээ одоо хүртэл эгдүүцэл нь арилахгүй
байна. “Шударга журам”-т ги­шүүн уг нь хууль сахиулагчид өөрийг нь
эвтэйхэн тойрч ороод, тойроод гараад явчихна  гэж бодсон юм билээ. Гэвч
“нус­гай”-гийнхан  тэгээгүй. Түү­нийг алгадаж унагаад л авах юмаа аваад
явчихсан. Гарах­даа ядаж “Уучлаарай” гэж нэг нь ч хэлээгүй гээд эрхэм
гишүүд одоо болтол гомдоллоод байгаа. Гэ­сэн хэр нь “Ийм бүдүүлэг
цаг­даа нарыг удирдаж суугаа Д.Сан­даг-Очирт хариуцлага тооцмоор байна.
Гүйцэтгэх албаны ажилтнууддаа төмөр өргөхөөс өөр юм заах цаг болжээ” гэж
хэн нь ч хэлээгүй. Харин ч “Гүйцэтгэсэн цагдаа нарт ямар ч буруу
байхгүй” хэмээн одоо “эр хүн” шиг загнаж байна. Оронд нь улс төрийн
өнцгөөр хангалттай тайлбар хийж буй. Өөрсдийг нь өмөөрөлгүй өдий хүрсэн
намын дарга С.Батболддоо го­мор­хож, бүр болоогүй ууган на­маа
бараадахаар болсон гэд­гээ зарлав. Гэхдээ яг аль нам, хүчинд дагаар орох
гэж буйгаа хэлэхгүй гэж гүрийгээд байгаа. Таамаглаж байгаагаар бол тэд
хаанаас ч юм түүнийгээ хайж эхэлсэн бололтой юм аа. Гэхдээ сонирхолтой
нь ууган нам нь МАХН биш гээд байгаа. “Тэр ууган нам чинь МАХН юм биш
үү” гэсэн ам алдуулах зорил­готой сэтгүүлчдийн так­­ти­кийн асуултад
“Ёстой үгүй, таасангүй” гэх нь холгүй  толгой сэгсэрцгээгээд байх юм,
дөрвүүлээ. “Тэгвэл ууган нам МАН-даа эвтэйхэн тогтоод үл­дээч дээ”
гэхээр бас өнөөх үйлдлээ давтана. Яг яах гээд байгаа юм бүү мэд. Тэдний
ярьж байгаагаар бол ууган намын шал өөр “copy” ямар ч гэсэн Монголд сэм
оршиж байгаа нь гарцаагүй болов. Уг нь хуучин, шинэ “Ху” намынхан
“Монголын ууган нам бол манай нам” гэж ирээд л хоорондоо олон сар
хэрэлдэж, сүүлдээ 50:50 харьцаатай хайн­цаад салсан шиг санагдана. Гэтэл
одоо бас нэг “Ууган нам”-ын сураг хаанаас гаргаад ирэв ээ, тэд. Эсвэл
муу нуухаар сайн илчил гэдэг болохоор үнэнээ түс тас хэлмээр юм даа.