Урлагийн амьдралдаа цэг тавихаар шийдсэнээ мэдэгдсэн дуучин Ч.Цэлмүүн “Exodus” буюу “Гэрлийн улирал” нэртэй анхны бөгөөд сүүлчийн цомгийнхоо нээлтийг хийх гэж байна. Цомгийн нээлт энэ сарын 18-нд буюу маргааш 15.00 цагт “Тэнгис” кино театрын нэг давхарт байрлах “Skytel D20”-н үйлчилгээний салбарт болох юм. Тэрбээр баярт ирсэн эхний 50 зочинд цомгоо үнэгүй бэлэглэх гэнэ. Мөн оройн 20.00 цагт “С1” телевизийн “Их завсарлага” нэвтрүүлэгт оролцож, уран бүтээлээ толилуулах ажээ.

“Universe Best Songs-2009” наадмаас уран бүтээлийн гараагаа эхэлсэн тэрбээр цомгийнхоо нэрний тухай тайлбарлахдаа: “Амьдралын хар бараанаас гэрэл гэгээ рүү гарах гэсэн утгатай. Одоо би эргээд энгийн амьдрал руугаа орж байна гэдэг утгаар энэ нэрийг өгсөн. Бас олны танил биш Цэлмүүнийг би өөрөө их үгүйлж байна. Ер нь эмэгтэй хүний хувьд олны танил байна гэдэг маш хэцүү. Байнга олны хараанд байдаг. Тиймээс нэг их хүсэхээр зүйл биш байна” гэжээ. Цэлмүүн биотехнологич мэргэжилтэй бөгөөд энэ чиглэлээр өөрийгөө улам бүр боловсруулан ажиллах сонирхолтой байгаа аж.