“Bee Gees” хамтлагийн дуучин 62 настай Робин Гиббт хэдхэн хоногийн нас үлдсэн гэнэ. Хорт хавдар туссан Робин Гиббийг өнгөрсөн баасан гаригт  комд орсны дараа эмч нар эхнэрт нь энэ тухай дуулгажээ. Тэрбээр хоёр жилийн өмнө ходоодны хорт хавдрын мэс засалд орсон ч хавдар элгэнд нь тархсан аж. Тэрбээр одоо Лондонгийн төв эмнэлэгт үхэлтэй тэмцэж байгаа бөгөөд түүнийг эхнэр Двина Гибб сахиж байгаа гэнэ. Ах дүү гурав Робин, Барри, Морис нарын “Bee Gees” хамтлаг 1960-1970 оны диско хөгжмийн эриний хамгийн алдартай нь байсан юм. Цомог нь 220 сая ширхэг худалдаалагдаж, бүх цаг үеийн хамгийн их борлуулалттай цомгийн эзэд болж байсан тэд 2003 онд Морисыг нас барсны дараа тарсан билээ.

Хожим нь Робин, Барри нар 2009 онд тайзнаа дахин гарах болсноо мэдэгдэж байсан. Робин Гибб  2010 онд “Daily Mail”-д өгсөн ярилцлагадаа Холливудын нэрт найруулагч Стивен Спильберг Манчестерийн гурвал хэрхэн дэлхийн хөгжмийн ертөнцөд шуугиан дэгдээж чадсаныг харуулж, кино бүтээх гэж буй тухай ярьж байжээ. Харамсалтай нь Робин Гибб удалгүй хорт хавдар тусч, ах дүү хоёр дахин нэгдэж чадаагүй билээ.