“Улс төр” мэдээллийн төвд өнөөдөр Төв аймгийн эмэгтэйчүүдийн холбооноос нийт “Эмэгтэйчүүдийн хөдөлгөөн” байгуулсан тухай сэтгүүлчдэд мэдээлэл хийв. Нийгмийн өөрчлөлтөд эмэгтэйчүүдийн манлайлал тодорхой хэмжээний үүрэг гүйцэтгэж байгаа ч орон нутагт энэ асуудал доголдолтой байгаа учраас Төв аймгийн эмэгтэйчүүд эвлэлдэн нэгдэж, “Эмэгтэйчүүд чадна” уриатай “Эмэгтэйчүүдийн хөдөлгөөн”  байгуулснаа өнөөдөр олон нийтэд албан ёсоор зарласан юм. Төв аймгийн бүх сумдаас төлөөлөл багтаасан тус хөдөлгөөн  одоогийн байдлаар 49 гишүүний бүрэлдэхүүнтэй үйл ажиллагаа явуулж байгаа бөгөөд Төв аймгийн сум бүрт хөдөлгөөнд элсэхийг хүссэн эмэгтэйчүүдийг бүртгэх ажлыг өнөөдрөөс эхлэн ирэх зургадугаар сар хүртэл зохион байгуулах гэнэ.

Төв аймгийн эмэгтэйчүүд орон нутгаас анх удаа зохион байгуулалтад орж, тулгарч байгаа асуудал, бэрхшээлтэй хамтдаа тэмцэх зорилт тавин ажиллаж эхэллээ. Тэд цаашид улс төр, эдийн засаг, байгаль экологийн гэсэн үндсэн гурван чиглэлд үйл ажиллагаа явуулж, эмэгтэйчүүдийн оролцоог дээшлүүлэн ажиллах гэнэ. Үүнд, орон нутгийн эмэгтэйчүүдэд өөрийн гэх өмч хомс тул эмэгтэйчүүдийн эдийн засгийн бие даасан чадавхийг дээшлүүлэх, өмчлөлийн асуудал, мөн тус тусдаа, багахан хэмжээнд ажиллаж байгаа эмэгтэйчүүдийн жижиг, дунд үйлдвэрлэлийг нөхөрлүүлэн хоршуулах замаар тэдний эдийн засгийн асуудлыг шийдэх зэрэг олон асуудлыг шийдвэрлэхээр төлөвлөөд байгаа аж. Мөн ирэх зургадугаар сард тохиох Орон нутгийн сонгуульд тухайн бүс нутагтаа нэр нөлөө бүхий, олны итгэлийг хүлээсэн эмэгтэйчүүдийг шийдвэр гаргах төвшинд оролцоход нь дэмжлэг үзүүлэн, сургах, итгэл үнэмшил олгох тал дээр хамтран ажиллах юм байна. Түүнчлэн, орон нутагт суудал бүхий эмэгтэйчүүдийн байр суурийг хадгалан нам эвсэл харгалзахгүйгээр дэмжих, цаашид энэхүү тоо нэмэгдүүлэн эмэгтэйчүүдийн оролцоог идэвхжүүлэх зэрэг олон ажил хийхээр төлөвлөөд буй ажээ.