Монгол Улс, Бүгд Найрамдах Литва Улсын Гадаад харилцааны яамд хоорондын улс төрийн гуравдугаар зөвлөлдөх уулзалт өнөөдөр /2012.04.16/ Улаанбаатар хотноо болов. Зөвлөлдөх уулзалтад Монголын талын төлөөлөгчдийг Гадаад харилцааны дэд сайд Г.Тэнгэр, Литвийн талын төлөөлөгчдийг БНЛУ-ын Гадаад хэргийн дэд сайд хатагтай Аста Скайсгирите Ляушкиене нар тэргүүлэн оролцов.

Зөвлөлдөх уулзалтын хүрээнд хоёр тал Монгол Улс, Бүгд Найрамдах Литва Улсын хоорондын улс төр, эдийн засгийн харилцаа, хамтын ажиллагааны өнөөгийн байдалд үнэлэлт дүгнэлт өгч, цаашдын харилцаа, хамтран хэрэгжүүлэх арга хэмжээ, төсөл, хөтөлбөрийн талаар санал солилцов.

Монгол Улс, Бүгд Найрамдах Литва Улс нь Европын Холбоо, Ардчилсан орнуудын хамтын нийгэмлэг, Европын Аюулгүй байдал, хамтын ажиллагааны байгууллага зэрэг олон улсын томоохон байгууллагуудын хүрээнд харилцаа, хамтын ажиллагаагаа идэвхтэй хөгжүүлж байгаа болно гэж ГХЯ-ны Олон нийттэй харилцах газраас мэдээлэв.