Долоо хоног бүрийн даваа гаригт УИХ дахь намын бүлгүүд ээлжит хуралдаанаа хийдэг ч энэ удаад МАН-ын бүлэг хуралдаж чадахгүй байна. Энэ нь тус бүлгийн найман гишүүн Хууль зүй, дотоод хэргийн сайд Ц.Нямдоржийг огцруулах төсөл мэдүүлсэнтэй холбоотой гэж үзэх хэсэг байна.

УИХ-ын гишүүн Ч.Улааны тайлбарласнаар бол ямар ч байсан сайд Ц.Нямдоржийг огцруулах саналаа нэр бүхий гишүүд эхний ээлжинд намын удирдлагууддаа мэдэгдсэн байна. Тэднийг энэхүү саналаа хэлэх үед нь Монгол Улсын Ерөнхий сайд, МАН-ын дарга С.Батболд, Шадар сайд М.Энхболд, МАН-ын бүлгийн дарга Ө.Энхтүвшин, МАН-ын ерөнхий нарийн бичгийн дарга У.Хүрэлсүх нар байсан аж. Тэд өнгөрсөн долоо хоногийн баасан гаригт хуралдсан МАН-ын Удирдах зөвлөл, МАН-ын бүлгээс гаргасан мэдэгдлийн хүрээнд Хууль зүй, дотоод хэргийн сайд Ц.Нямдоржийг огцруулах асуудлаа тавьж байгаагаа онцолсон. Удирдлагуудын хувьд асуудалд зэмлэсэн хийгээд дэмжсэн өнгө аясын аль алийг илэрхийлээгүй” гэж хэлж буй юм.