Улсын хэмжээнд сүүлийн таван жилийн байдлаар буюу 2007-2011 онд хар тамхи, мансууруулах бодистой холбоотой гэмт хэрэгт ял шийтгүүлэгчдийн талаарх судалгааг Улсын Дээд шүүхийн Судалгааны төв гаргажээ. Дээрх хугацаанд энэ төрлийн 28 гэмт хэрэгт 66 хүн ял шийтгүүлсэн байна.

2007-2010 оны байдлаар шүүхээр шийдвэрлэгдсэн “хар тамхины” гэмт хэргийн тоо харьцангуй тогтвортой буюу 2007 онд  гурван  гэмт хэрэгт 16 хүн, 2008 онд хоёр  гэмт хэрэгт найман хүн, 2009 онд дөрвөн  гэмт хэрэгт  найман  хүн, 2010 онд таван  гэмт хэрэгт долоон хүн тус тус ял шийтгүүлжээ. Харин 2011 онд 14 гэмт хэрэгт 27 хүн ял шийтгүүлсэн нь өмнөх дөрвөн  жилийн  хугацаанд ял шийтгүүлсэн хүний  тоотой тэнцэж байгаа  юм.

Сүүлийн таван жилийн байдлаар энэ төрлийн гэмт хэрэгт шийтгүүлсэн 66 хүний 32-т нь хорих, 31-д нь баривчлах, хоёрд нь албадан ажил хийлгэх, нэг хүнд  торгох ял оногдуулсан байна. Судалгаанаас үзвэл 19-30 насны залуус хар тамхины гэмт хэрэгт холбогдох нь харьцангуй олон байгаа аж. Тухайлбал дээрх хугацаанд  энэ төрлийн гэмт хэрэгт дээрх насны 50 залуу ял шийтгүүлсэн нь нийт ял шийтгүүлэгчдийн дийлэнх олонхийг буюу 75.8 хувийг эзэлжээ. Мөн насанд хүрээгүй буюу 17-18 насны   хоёр хүн хар тамхины хэрэгт ял шийтгүүлсэн байна.
    
Хар тамхины хэрэгт ял шийтгүүлэгчдийн олонхи нь буюу 44 нь бүрэн дунд боловсролтой байгаа бол 14 нь дээд, нэг нь тусгай дунд,  дөрөв  нь суурь, гурав  нь бага боловсролтой байв.

Түүнчлэн ял шийтгүүлэгчдийн 20 нь эрхэлсэн ажил сургуульгүй, 14 нь оюутан, 32 нь бусад хүмүүс байв. Дээрх 66 иргэнээс таван  гадаадын иргэн,  долоон эмэгтэй хүн хар тамхины хэрэгт ял шийтгүүлжээ.