МАХН-ын дарга Н.Энхбаярыг өчигдөр оройн 20.00 цагийн үед Удирдлагын академийн ойролцоо хамгаалагчдын хамт явж байхад нь АТГ-ын ажилтнууд баривчлахаар УБҮ 00-55 улсын дугаартай, Land Cruiser маркийн автомашиныг нь зогсоож,  саатуулсан билээ. Улмаар түүнийг өглөөний 06.05 цагийн орчимд албадан баривчилж, Төв аймгийн Урьдчилан хорих төв рүү хүргэсэн юм. Тэгвэл, Удирдлагын академийн ойролцоо машинтай явж байхад нь саатуулж, амь насанд нь халдахыг завдсан, галт зэвсэг хэрэглэсэн зэрэг асуудалд АТГ-ын Мөрдөн шалгах хэлтсийн дарга Д.Цоодолсэнгээ албаны тайлбар өглөө.

-Н.Энхбаярын машиныг саатуулах үеийн процессийг ярихгүй юү?

-Бид Н.Энхбаярын машиныг  зогсоож, түр саатуулах шийдвэрийг танилцуулахыг хүссэн юм. Гэтэл түүний хамгаалагчид машины хаалгаа онгойлгоогүй. Удалгүй хамгаалагч машинаас бууж ирэх үедээ буугаа гаргаж ирээд сумласан. Энэ үед манай ажилтан буугаа буулган хамгаалагчийг мөн буугаа буулгахыг хүссэн юм. Гэтэл хүлээн зөвшөөрөөгүй. Манай ажилтан овсгоо самбаа хэрэглэж, түүний бууг булаан авч чадсан. Бууг хурааж авахад буу нь сумлаатай байсан. 

-Танай ажилтнууд Н.Энхбаярын биед халдсан гэх мэдээлэл гарсан?
-Бид Н.Энхбаярын биед огт халдаагүй. Харин өөрөө манай ажилтныг тэвэрч авчихаад тойрч зогссон иргэд рүү “Гар утсаар миний зургийг аваарай. Эд нар миний биед халдаж байна” гэж орилж байсан. Чухамдаа түүний амь насыг хороох гэж байсан гэх мэдээлэл ор үндэслэлгүй юм.