Сууц өмчлөгчдийн холбоо иргэдийн эрүүл, тав тухтай орчинд амьдрах нөхцөлийг бүрдүүлэх үүрэгтэй олон нийтийн байгууллага билээ. Гэсэн ч сүүлийн жилүүдэд иргэдээс СӨХ-ны талаар санал гомдол олноор ирэх болсон. СӨХ иргэдээс хураасан мөнгө хаана юунд зарцуулагддаг нь бүрхэг байдаг. Баянзүрх дүүргийн Засаг даргын Тамгын газар, Монголын Сууц өмчлөгчдийн холбооны дээд зөвлөл хамтран 2012 оны түвшин тогтоох үзлэг шалгалтыг хийлээ. Шалгалтад дүүргийн нутаг дэвсгэрт үйл ажиллагаа явуулдаг 120 СӨХ-ноос 60 нь хамрагдаж 53 нь хангалттай үнэлгээ авчээ. 

Баянзүрх дүүргийн хэмжээнд 2009 онд 84 СӨХ-той байсан бол 2011 оны байдлаар 117 хүрээд байна. Дүүргийн нутаг дэвсгэрт үйл ажиллагаа явуулж буй Сууц өмчлөгчдийн холбоод зохион байгуулалтын хувьд “Сэлбэ”, “Сансар”, “Гишүүн бус” гэсэн гурван салбар зөвлөл болон үйл ажиллагаагаа явуулж байна.