Энэ удаагийн Монгол Улсын Ерөнхийлөгчийн нэрэмжит шагналыг залуу эмч Сэмбэрүүний Булгамаа, Гомбын Отгонтуяа, Бямбажавын Энхзаяа нарт хүртлээ. Шагналыг Ерөнхийлөгчийн тамгын газрын дарга Д.Баттулга, Ерөнхийлөгчийн зөвлөх Р.Болд, ЭМЯ-ны төрийн нарийн бичгийн дарга Н.Түмэндэмбэрэл нар гардууллаа. 

Увс аймгийн нэгдсэн эмнэлгийн их эмч Сэмбэрүүний Булгамаа

Хөдөө орон нутгийн ард иргэдэд эмнэлгийн нарийн мэргэжлийн тусламж үйлчилгээг шуурхай, хүртээмжтэй хүргэхийн сацуу “Тикийн оношлогоо, эмчилгээний асуудалд” сэдвээр эрдэм шинжигээний бэсрэг бүтээл туурвиж олон улсын сэтгүүлд нийтлүүлэх, тархины цус харвалттай өвчтөнүүдэд “Судасны агшил тавиулах” эмчилгээг үр дүнтэй хийж эмчилгээ, үйлчилгээний чанарт мэдэгдэхүйц дэвшил гаргасан Монгол Улсын Ерөнхийлөгчийн нэрэмжит 2012 оны шагналыг хүртээлээ.

Улсын клиникийн төв эмнэлгийн яаралтай тусламж, сургалт арга зүйн төвийн их эмч Гомбын Отгонтуяа  

Цусны эргэлт, зохиомол амьсгалыг удирдах, инвазив ажилбарууд болон хагалгааны мэдээгүйжүүлэгийг  мэргэжлийн өндөр түвшинд гүйцэтгэх зэргээр эрчимт эмчилгээ, яаралтай тусламжийн үйлчилгээг цаг алдалгүй хүргэж олон хүний амь нас, эрүүл мэндийг аврахад оруулсан зүтгэлийг үнэлж, Монгол Улсын Ерөнхийлөгчийн нэрэмжит 2012 оны шагналыг хүртээлээ.

Завхан аймгийн нэгдсэн эмнэлгийн их эмч Бямбажавын Энхзаяа  

Эрүүл мэндийн хоёр дахь шатны тусламж үйлчилгээг чанартай, чадварлаг үзүүлж хүүхдийн эрүү, нүүр, шүдний өвчлөлийг бууруулах, эмчлэх талаар эмчилгээний дэвшилтэт аргуудыг шинээр нэвтрүүлж, хүн ардын эрүүл мэндийг хамгаалах үйлс, эрхэлсэн ажилдаа өндөр амжилт гаргасан зүтгэлийг үнэлж шилдэг залуу эмчид олгох Монгол Улсын Ерөнхийлөгчийн нэрэмжит 2012 оны шагналыг хүртээлээ.