Их хотын асуудлын гол цөм нь иргэдийн сэтгэл зүйн асуудал байдаг нь бидний амьдралаас тодорхой харагддаг. Хүүхдийн хүмүүжил, гэр бүлийн нарийн асуудлууд, хүмүүсийн харилцаа, стресс бухимдал, зөрчил, маргаан, ганцаардал, ажлын бүтээмжгүй байдал зэрэг нь нийгэм-сэтгэл зүйн учир шалтгаантай юм. Үүнийг эмчлэх, эдгээхийн тулд ямар нэгэн арга заслаас илүү хүн өөрийгөө ойлгож, мэдрэх асуудал чухал.

Тиймээс Сэтгэл Судлалын Үндэсний Төв сэтгэл зүйн үйлчилгээг олон нийтэд хүргэх зорилгоор сар бүрийн 3 дахь долоо хоногийн баасан гаригийг нээлттэй өдөр болгон сэтгэл зүйн зөвлөгөөг үнэ төлбөргүй өгдөг.

Энэ сарын нээлттэй өдөрлөг 20-ны баасан гаригт болох ба та хүүхдийн, бие хүний, гэр бүлийн асуудлын хүрээнд зөвлөгөө авах боломжтой болоод байна. Сэтгэл зүйн зөвлөгөөний хэрэгцээ шаардлага улам бүр нэмэгдэж байгаа өнөө үед энэхүү үйл ажиллагаа хүмүүсийн сонирхлыг татаж үйлчлүүлэх хүрээ нь нэмэгдсэн байна.