Элсэлтийн ерөнхий шалгалтын шалгуулагчдын бүртгэл дуусахад тав хоног үлдээд байна. Өөрөөр хэлбэл энэ сарын 16-ны 18 цагт бүртгэл автоматаар зогсох юм. Иймээс Боловсролын үнэлгээний төв уртасгасан цагаар ажиллаж эхэлжээ. Ажлын өдрүүдэд 09.00-20.00 цагийн хооронд, амралтын өдрүүдэд 10.00-17.00 хооронд ажиллаж, бүртгэл хийж байгаа юм байна.

Өнөөдрийн байдлаар 35 мянга гаруй шалгуулагч бүртгүүлж амжсан аж. Бүртгэлтэй холбоотой алдааг бүртгэлийн хугацаанд өргөдлийн дагуу засч, залруулах бүрэн боломжтой байгаа ажээ. Харъяа газрын Боловсрол соёлын газрын Элсэлтийн ерөнхий шалгалтын Зөвлөгөө, мэдээлэл хариуцсан ажилтанд өргөдөл өгсөнөөр өөрийн буруу оруулсан мэдээллээ засуулж болох юм байна. Гэхдээ зөвхөн хувийн мэдээлэл засч болох бөгөөд хичээл сонголтыг өөрчлөх боломжгүй ажээ.