УИХ-ын Байгаль орчин, хүнс хөдөө аж ахуйн байнгын хорооны хуралдаан болж, Байгаль орчныг хамгаалах тухай хуульд нэмэлт, өөрчлөлт оруулах тухай багц төслүүдийн анхны хэлэлцүүлгийг хийлээ. Хэлэлцүүлгийн шатанд гишүүд уул уурхайн эрчимтэй хөгжлийг дагаад байгаль экологийн тэнцвэрт байдал алдагдаж байгааг сануулав. Учир нь нүүрс тээвэрлэх нэрийн дор Хятадаас орж ирсэн 100 тоннын даацтай авто машинууд тээвэрлэлт хийж, зам харгуйг эвдэх болжээ. Ядахад нэг замаар явдаггүй, дуртай газраараа цагаан тоос татуулан давхидаг. Хүнд даацын тэр дундаа 140-150 тоннын даацтай авто машинууд тээвэрлэлт хийж байгаа учраас хөрсийг үндсэнд нь эргүүлэх болсон. Эл тээвэрлэлт харин Хятад улсад хийгддэггүй, урд хөршийн хил давангуут жижиг даацын тэргээр нүүрсийг зөөвөрлөдөг гээд ялгаатай талууд харагдсаар байтал өдийг хүртэл үүнийг нь хүлээн зөвшөөрч ирсэн нь мэргэжлийн байгууллагууд ажиллахгүй байна гэх хардлага тээхэд ч хүргэсэн юм. Тиймээс эл хуульд дэд бүтцээ шийдвэрлэсэн цагт тээвэрлэлт хийдэг болох заалт тусгаж өгөх нь байгаль орчноо хамгаалах нэг суурь зарчим болно гэж үзэж байна.

Мөн УИХ-ын гишүүн П.Алтангэрэл байгалийн нөөц ашигласны төлбөрийг эргүүлээд байгаль экологийг нөхөн сэргээхэд зарцуулдаг болох шаардлага байна гэв. Одоогийн хүчин төгөлдөр мөрдөж байгаа хуулиар байгалийн нөөц ашигласны төлбөрийг хураан авдаг ч өөр зүйлд зарцуулж байгаа учраас нөхөн сэргээлтийн ажил тодорхой үр дүнд хүрэхгүй байна гэж үзсэн юм. Хуулийн төслийг боловсруулах ажлын хэсгийн ахлагчаар ажиллаж байгаа УИХ-ын гишүүн Л.Гансүхийн тайлбараар бол энэ төрлийн заалт тодорхой хэмжээгээр энэхүү төсөлд тусгалаа олсон гэлээ. Харин зам харгуй эвдэж байгаа хүнд даацын авто машинуудын тухайд тэдгээрийн тээвэрлэлтийг зогсоох эрх нь Зам ,тээвэр аялал жуулчлалын яам болон Мэргэжлийн хяналтын ерөнхий газарт байгаа. Тиймээс эл газруудад асуудал тавих нь илүү оновчтой гэж хариулав.

Харин УИХ-ын гишүүн Э.Бат-Үүлийн хувьд төв суурин газарт амьдарч байгаа тэр дундаа нийслэлчүүдийн хувьд Үндсэн хуулиар олгогдсон эрх нь зөрчигдөж байна гэж үзлээ. Уг нь нийслэлийн гэр хорооллыг барилгажуулах асуудлыг Засгийн газар хэдэн жилийн өмнө лоозонгоо болгосон ч одоо хэр нь ахиагүй. Гэр хороололд инженерийнх нь шугам сүлжээг шийдээд өгсөн цагт иргэд өөрсдөө байшингаа барьчихна. Ингэснээр хөрсний бохирдол буурна. Байгаль орчныг хамгаалах тухай хуульд хөрсний бохирдол том байр суурь эзлэх ёстой ч эл төсөлд энэ талын нэг ч өгүүлбэр байхгүй байгаа нь шүүмжлэлтэй хандахаас аргагүй байна гэсэн юм.

Монгол Улсын хэмжээнд өнөөдөр 726 мянган өрх байгаагаас 126 мянган нь цэвэр, бохир усны шугамд холбогдсон, орон сууцанд амьдардаг гэнэ. Өөрөөр хэлбэл, нийт өрхийн 80 хувь нь цэвэр, бохир усны шугамд холбогдоогүй орчинд амьдарч байна гэсэн үг аж.

Эцэст нь энэхүү хуулийн төслийг чуулганы нэгдсэн хуралдаанаар хэлэлцүүлэхээр болж шийдвэрлэв.