Долдугаар сарын 1-ний хэрэгт буруутгагдаад буй цагдаагийн экс дарга нарт өмгөөлөл үзүүлж байсан дөрвөн өмгөөлөгч өнгөрсөн гуравдугаар сарын 28-нд болсон шүүх хурлын үеэр шүүгдэгчдээсээ өмгөөлөл үзүүлэхээс татгалзаж, шүүх хурлыг орхин гарсан үйлдлийг хууль зөрчсөн, шүүхийг илтэд үл хүндэтгэсэн гэж үзээд ЦЕГ-ын үүрэг гүйцэтгэгч асан, хошууч генерал Ч.Амарболдын өмгөөлөгч О.Алтангэрэлийг өнгөрөгч даваа гаригт 14 хоногийн хугацаатай баривчлаад байгаа.

Харин өнөөдөр Нийслэлийн цагдаагийн газрын Хэв журмын хэлтсийн дарга асан, цагдаагийн дэд хурандаа Г.Ганбаатарын өмгөөлөгч Т.Мөнхдэлгэрийг Сүхбаатар дүүргийн шүүхээс захирамж гарган, баривчилсан байна. Өмгөөлөгч Т.Мөнхдэлгэр нь гуравдугаар сарын 28-ны өдөр болсон шүүх хурлын үеэр О.Алтангэрэлийн хамт шүүх танхимыг орхиж гарсан билээ. Тэрбээр өнгөрөгч гуравдугаар сарын 14-нд болсон шүүх хурлын дараагаас Нийслэлийн цагдаагийн газрын Хэв журмын хэлтсийн дарга асан, цагдаагийн дэд хурандаа Г.Ганбаатарын өмгөөлөгчөөр ажиллаж эхэлсэн юм.