УИХ-ын Хууль зүйн байнгын хороо өчигдөр хуралдах байсан ч АН-ын бүлэг хуралдсан тул ирц бүрдэлгүй хойшилсон юм. Мөн УИХ-ын даргын өрөөнд намын бүлгийн дарга нар, бие даагч гишүүн З.Алтай, ИЗНН-ын дарга Д.Энхбат, СЕХ, Нийслэлийн ИТХ-ын төлөөлөл цугларан сонгуулийн асуудлаар зөвшилцсөн нь байнгын хорооны хурал хойшлоход хүргэсэн.

Тэгвэл Хууль зүйн байнгын хороог өнөөдөр хуралдуулахаар болжээ. УИХ- ын сонгуулийн тухай хуулийн зарим зүйл, заалтын холбогдох хэсэг Үндсэн хуулийн холбогдох зүйл, заалтыг зөрчсөн эсэх тухай маргааныг хянан шийдвэрлэсэн тухай Үндсэн хуулийн Цэцийн 02 дугаар дүгнэлт, Монгол Улсын Ерөнхийлөгчийн санаачилсан Эрүүгийн тухай хуульд нэмэлт, өөрчлөлт оруулах тухай зэрэг асуудлыг хэлэлцэхээр болсон байна.