Шинэ он гарснаас хойш “Дорнод”-ыг тэргүүлэх болсон NHL-ийн дөрвөн удаагийн аварга “Нью-Йорк Рейнжерс” 109 оноогоор бүсийн аварга боллоо. Тэд хамгийн сүүлд 18 жилийн өмнө “Дорнод”-ын аварга болж байв. Өнгөрсөн жилийн Стэнлийн цомын эзэн “Бостон Брюинз” 102 оноогоор аман хүзүүдсэн. Аваргууд сүүлийн таван тоглолтынхоо нэгээс бусдад нь ялалт байгуулсан амжилттай. Ингэхдээ бүсийн тэргүүн баг “Рейнжерс”-ийг хоёр удаа сөхрүүлснийг нь бодох юм бол плей-оффт дээгүүр үзэх төлөвтэй. Тэдний араас “Флорида”, “Питтсбург”, “Филадельфи”, “Нью-Жерси” бичигдсэн. “Орос пуужин” хочит Павел Бурегийн үед шилдэг амжилт үзүүлж байсан “Флорида Фантерз” анх удаа дивизионы аварга болсон бөгөөд тэд плей-оффын эхний шатанд “Чөтгөрүүд”-тэй хүч үзнэ. Харин дөрөв, тавдугаарт жагссан хүчирхэг бүрэлдэхүүнтэй “Питтсбург”, “Филадельфи” нэгийн даваанд таарсан нь хоккей сонирхогчдын ярих сэдэв болж байна. Уг нь тэд авсан оноо, үзүүлсэн амжилтаараа зөвхөн “Рейнжерс”-ийн дараа бичигдсэн ч “Бостон”, “Флорида” дивизионы аварга болсноор өмнүүр нь юм. Харин сүүлийн хоёр жил дараалан “Дорнод”-ын аварга болсон “Вашингтон Кэпиталз” энэ улиралд ойрын хэдэн жилд байгаагүйгээр муу тоглож, арай гэж плей-оффт өрсөлдөх эрхтэй үлдсэн. Овечкин ба түүний нөхөд сүүлийн таван тоглолтынхоо дөрөвт нь ялалт байгуулснаар Канадын нийслэлийн багийн өмнө орж, эцсийн хоромд долдугаарт жагссан. Ингэснээр тэд эхний шатанд өнгөрсөн жилийн NHL-ийн аварга “Бостон”-той тоглох болов. Харин энэ бүсийн сүүлийн азтан “Оттава Сенатерз”. Уг нь тэд плей-оффт зургаа, долдугаар байраар шалгарах боломжтой байсан ч сүүлийн гурван тулаандаа бүдэрснээр эхний шатанд “Рейнжерс”-тэй учраа таарах боллоо.

Үзэгчдийн итгэлийг хамгийн ихээр хөсөрдүүлсэн багаар “Тампа-Бэй Лай­тнинг” өрсөлдөгчгүй тодров. Дэлхийн хамгийн хүчирхэг лигт өдгөө хамгийн хурц од болоод буй Стивен Стэмкос, Винсент Лекавалье, Мартин Сент-Луи, Тедди Пурселл, Дуайн Ролосон нарын шилдэг тоглогчтой “Цахилгаанууд” шүтэн бишрэгчдийнхээ урмыг хугалж, энэ жилийн плей-оффыг цэнхэр дэлгэцээр үзэх болсон. Багийн лидер Стэмкос энэ улиралд өрсөлдөгчийнхөө хаалгыг 60 шайбаар мялааснаар Морис Ришарын нэрэмжит шагнал хүртсэнээс гадна ийм тооны босго алхсан 19 дэх хоккейчин болсон. Түүнээс өмнө алдарт Уэйн Гретцки, Марио Лемье, Бретт Халл, Александр Овечкин нар нэг улиралд 60 дээш гоол оруулж байв.

Өнгөрсөн жилийн улирлын тоглолтын аварга “Ванкувер Кэнакс” энэ улирлыг 111 оноотой өндөрлүүлж, хоёр жил дараалан “Ерөнхийлөгчийн цом”-ыг хүртэв. Канадын баг сүүлийн 10 тоглолтынхоо нэгээс бусдад нь ялалт байгуулснаар лигийг тэргүүлсэн. Харин “Сент-Луис Блюз” тэргүүлэгчээс хоёр онооны алдагдалтай “Өрнөд” бүстээ аман хүзүүдэв. “Сент-Луис” 1999-2000 оны улиралд ганц удаа бүсийн аварга болж байсан бөгөөд үүнийгээ давтах өндөр магадлалтай байсан ч сүүлийн таван тулааныхаа дөрөвт нь хожигдсоноор мөрөөдлөө хойшлуулахад хүрсэн юм. “Өрнөд”-ийн гуравдугаарт “Финикс Койтс” бичигдлээ. Ердөө жилийн өмнө дампуурах дээрээ тулаад байсан “Финикс”-ийн энэхүү амжилт ерөнхий дасгалжуулагч Дэйв Типпеттэй салшгүй холбоотой. Чухам тэр багийн ахлагч Шейн Доанаас өөр гялтайх одгүй “Өөдгүй амьтад”-ыг нэг цул баг болгон зангидаж чадсанаар энэ сэдвээр дагнан бичдэг тоймчдоос өндөр үнэлгээ авсан. Тэдний араас “Нэшвилл”, “Детройт”, “Чикаго”, “Сан-Хосе” бичигдсэн. “Нэшвилл Предаторс”-оос бусад нь Стэнлийн цом хүртээд үзсэн топ ангилалд багтдаг баг. Харин байгуулагдаад яг 15 жилийн нүүр үзэж буй “Нэшвилл” өмнө дундаж багийн зэрэглэлд багтдаг байсан. Гэсэн ч энэ жилийн плей-оффт тэднээс ямар ч сенсаац ирж магадгүй. Нэг ёсондоо тэсрэлт хийх цаг нь болсон. Тэд плей-оффт өндөр амжилт гаргахын тулд ОХУ-ын “Тивийн хоккейн лиг”-ийн супер од Александр Радуловыг өнгөрсөн сарын сүүлчээр эх орноос нь урвуулсан. “Араатнууд” эхний шатанд Никлас Лидстрем, Павел Дацюк, Хенрик Зеттерберг, Тодд Бертуцци, Томас Холмстрем нарын хал үзэж, халуун чулуу долоосон “Детройт Ред Уингз”-тэй тулалдана.

Нэг хэсэг плей-оффын бүст багтаж, бүр “Өрнөд”-ийг өнгөлж явсан “Даллас Старз”, “Миннесота Уайлд” багууд улаан шугамны гадна үлдлээ. 2011-2012 оны улирал эхэлснээс хойш хомоол хамсан Канадын шигшээ багийн ахлагч Рик Нэшийн “Коламбус Блю Жэкетс” 52 оноотойгоор баян ходоод болов.

Мэргэн буучид:

Тоглогч                                                 О
       
1. Евгений Малкин (Питтсбург)              109    50    59
2. Стивен Стэмкос (Тампа-Бэй)              97    60    37
3. Клод Жиру (Филадельфи)                  93    28    65
4. Жейсон Спецца (Оттава)                    84    34    50
5. Илья Ковальчук (Нью-Жерси)             83    37    46
6. Фил Кессел (Торонто)                         82    37    45
7. Жеймс Нил (Питтсбург)                       81    40    41
8. Жон Таварес (Айлендерс)                   81    31    50
9. Хенрик Седин (Ванкувер)                    81    14    67
10. Патрик Элиаш (Нью-Жерси)              78    26    52

Улирлын тоглолтын дүн:

“Дорнод” бүс

Баг                                           Тт      Ш/З        О

1. Нью-Йорк Рейнжерс              82    226-187    109
2. Бостон Брюинз                     82    269-202    102
3. Флорида Пантерз                  82    203-227    94
4. Питтсбург Пингвинз               82    282-221    108
5. Филадельфи Флайерз           82    264-232    103
6. Нью-Жерси Дэвилз                82    228-209    102
7. Вашингтон Кэпиталз              82    222-230    92
8. Оттава Сенаторз                    82    249-240    92
9. Баффало Сэйбрз                   82    218-230    89
10. Виннипег Жетс                     82    225-246    84
11. Тампа-Бэй Лайтнинг             82    235-281    84
12. Каролина Харрикейнз           82    213-243    82
13. Торонто Мэйпл Ливз             82    231-264    80
14. Нью-Йорк Айлендерс           82    203-255    79
15. Монреаль Канадиенс           82    212-226    78
    
“Өрнөд” бүс

Баг                                           Тт      Ш/З        О

1. Ванкувер Кэнакс                   82    249-198    111
2. Сент-Луис Блюз                    82    210-165    109
3. Финикс Койотс                      82    216-204    97
4. Нэшвилл Предаторз              82    237-210    104
5. Детройт Ред Уингз                 82    248-203    102
6. Чикаго Блэкхокс                   82    248-238    101
7. Сан-Хосе Шаркс                    82    228-210    96
8. Лос-Анжелес Кингз               82    194-179    95
9. Калгари Флэймз                    82    202-226    90
10. Даллас Старз                      82    211-222    89
11. Колорадо Эвеланш              82    208-220    88
12. Миннесота Уайлд                82    177-226    81
13. Анахайм Дакс                     82    204-231    80
14. Эдмонтон Ойлерз                82    212-239    74
15. Коламбус Блю Жэкетс         82    202-262    65