Багануур дүүргийн ШШГЕГ-ын харьяа 427-р  хорих ангиас гурван ялтан оргосон хэрэг энэ сарын  8-нд  гарсан. ШШГЕГ-ынхан болон Цагдаагийн байгууллагын ажилтнууд өндөржүүлсэн бэлэн байдал зарлаж оргодлуудыг нэхэн тэдний хоёрыг нь буюу Б.Батболд, Т.Анхболд нарыг Төв аймгийн Баяндэлгэр сумын нутгаас энэ сарын 9-ний өглөөний 07 цагийн орчим баривчилсан юм. Харин ялтан Д.Батбаярыг орон даяар эрэн сурвалжилж байсан билээ. Түүнийг  энэ сарын 9-10-нд шилжих шөнийн 01.50 цагт Багануур дүүргийн 3-р хорооны нутаг дэвсгэрт байрлах “Зам зуур” цайны газраас эрлийн бүлэг баривчилжээ.

Д.Батбаяр нь 2007 оны  хоёрдугаар сарын 15-ны өдөр Сүхбаатар дүүргийн шүүхийн 59-р тогтоолоор Эрүүгийн хуулийн 145.4, 234.2-р  бүлэг хулгай, шунахайн сэдэлтээр аж ахуйн нэгж, байгууллагын мэдэлд байгаа баримт бичиг, тамга, тэмдэг, хэвлэмэл маягтыг хулгайлсан, устгасан гэх хэргээр арван жил 10 хоног хорих ялыг чанга дэглэмтэй хорих ангид эдлэхээр шийтгэгдсэн нэгэн аж. Тэрбээр суллагдахад дөрвөн жил дөрвөн сарын хугацаа  үлдээд байжээ.