Улсын бүртгэлийн ерөнхий газрын нийт ажилтнуудын хурал Хүүхдийн урлан бүтээх төвд болж байна. Хууль зүй, дотоод хэргийн сайд Ц.Нямдорж, УБЕГ-ын дарга Л.Амарсанаа нар УБЕГ-ын харьяа Иргэний бүртгэлийн газрыг татан буулгаж, энэ талаарх сайдын тушаалыг Хүүхдийн урлан бүтээх төвийн байранд тус газрын ажилчидтай хийх уулзалтын үеэр танилцуулна гэх мэдээлэл гарсан юм. Хурал эхлэхийн өмнө УБЕГ-ын дарга Л.Амарсанаагаас цөөн асуултад хариулт авлаа.

-УБЕГ-ын татан буулгах тушаал гарсан гэх мэдээлэл байна.  Өнөөдөр чухам ямар асуудлаар хуралдах гэж байгаа юм бэ?

-Тодорхой бүтцийн өөрчлөлт хийхээр болсон. Гэхдээ УБЕГ-ыг татан буулгана гэсэн ойлголт, тийм тушаал  байхгүй.

-Чухам ямар газар, хэлтэст өөрчлөлт орж байгаа вэ?

-Энэ талаар хурлын дараа мэдээлэл өгнө. Одоо мэдэхгүй байна.

-Өөрчлөлт оруулах шаардлага байна гэж үзсэн үү?

-Шаардлага байгаа шүү дээ. УБЕГ иргэддээ түргэн шуурхай үйлчлэх зорилготой газар. Энэ газарт олон дарга, данхайсан удирдлага байна. Түүнийг  цөөлөх шаардлагатай.

-Таныг солих гэж байгаа гэх яриа ч байна?

-Өнөөдрийн хувьд би ажлаа хийгээд явж байна. Хурлаас ямар шийдвэр гарахыг мэдэхгүй юм.

УБЕГ-ын харьяа долоон газар бий, улсын хэмжээнд 1200 гаруй ажилтантай. Тус  газрын харьяа газрын дарга, орлогч дарга, хэлтсийн дарга, хэлтсийн орлогч дарга гэсэн 30 орчим даргын орон тоо байдаг аж.