УИХ дахь АН, МАН-ын бүлгийн гишүүд Орон нутгийн сонгуулийг хэзээ, ямар зарчмаар явуулах талаар өөр өөрийн байр суурийг хамгаалсан хэвээрээ байгаа тул хаврын чуулганы нээлтийн дараагийн өдрөөс эхэлсэн гацаа өнөөдрийн байдлаар арилсангүй.

Бүлэг тус бүрээс тав таван хүний бүрэлдэхүүнтэй гаргасан ажлын хэсгийнхэн өнөөдөр уулзаж ярилцах байсан ч ирц гүйцээгүйн улмаас хуралдаж чадсангүй. УИХ дахь АН-ын бүлгийнхэн орон нутгийн сонгуулийг УИХ-ын сонгуультай хамтатган явуулах зарчим дээрээ хэвээрээ байгаа төдийгүй Үндсэн хуулийн Цэцийн дунд суудлын хуралдаанаар түдгэлзүүлсэн УИХ-ын сонгуулийн хуулийн мажоритар хувилбараар өрсөлдөгчдөөс 28 хувиас дээш саналтай ч “өвдөг шороодсон” нэр дэвшигчдийг пропорциональ хэсэг рүү гулсуулах заалтыг хуульд хэвээр үлдээнэ гэсэн байр сууриа илэрхийллээ. Харин МАН-ын бүлгийнхэн энэ талаар ямар шийдэлд хүрч буйгаа мэдээлсэнгүй.

Маргааш болох Төрийн байгуулалтын байнгын хорооны хурал дээр орон нутгийн сонгуулийн хуулийн улмаас үүссэн гацаа арилах эсэх нь тодорхой болох юм.