Багануур дахь хорих ангид ял эдэлж байсан  гурван ялтан  дөрөвдүгээр сарын 08-ны оройн  22.30  цагийн орчим оргожээ. Д.Батбаяр, Т.Анхболд, Б.Батболд нар нь  хориотой бүсийн өргөст торны завсраар нэвтэрч гарсан байна. Эдгээр ялтныг эрэн сурвалжлах ажиллагааг Багануур дүүрэг, Төв аймгийн Эрдэнэ, Баяндэлгэр сум, Төмөр замын 82 дугаар өртөө, Дорнод, Говьсүмбэр аймаг, Улаанбаатар хотод Баянзүрх, Чингэлтэй, Хан-Уул дүүргийн нутаг дэвсгэрт Шүүхийн шийдвэр гүйцэтгэх ерөнхий газрын болон Хорих анги, шийдвэр гүйцэтгэх албаны  73 алба хаагч, 23 чиглэлд шуурхай зохион байгуулж, 09-ний буюу өнөөдөр өглөөний 07.24 цагт Төв аймгийн Баяндэлгэр сумын орчмоос Багануур дахь шийдвэр гүйцэтгэх албаны гадна хамгаалалтын офицер, ахмад З.Мөнхжаргал, ээлжийн дарга, ахмад Д.Батмөнх, хянагч, ахлах ахлагч С.Отгонболд нар ялтан Т.Анхболд, Б.Батболд нарыг олж, баривчилжээ. Одоогоор ялтан Д.Батбаярыг эрэн сурвалжлах ажиллагаа үргэлжилсээр байна.

Т.Анхболд нь 2011 оны арванхоёрдугаар сарын 09-ний өдөр Эрүүгийн хуулийн 181.3-р танхайн хэргээр зургаан жил зургаан сарын хорих ялыг чанга дэглэмтэй хорих ангид эдлэхээр шийтгэгдэж, таван жил найман сар ял эдлэх үлдээд байсан гэнэ.  Харин Б.Батболд нь 2011 оны  хоёрдугаар сарын 25-ны өдөр Эрүүгийн хуулийн 145.2, 147.2-р буюу хулгай, дээрмийн хэргээр  долоон жилийн хорих ялыг чанга дэглэмтэй хорих ангид эдлэхээр шийтгэгдсэн ба таван жил, найман сар ял эдлэх хугацаа үлдсэн байжээ. Түүнчлэн одоогоор баривчлагдаагүй байгаа Д.Батбаяр нь 2007 оны хоёрдугаар сарын 15-ны өдөр Сүхбаатар дүүргийн шүүхийн 59-р тогтоолоор Эрүүгийн хуулийн 145.4, 234.2-р  бүлэг хулгай, шунахайн сэдэлтээр аж ахуйн нэгж, байгууллагын мэдэлд байгаа баримт бичиг, тамга, тэмдэг, хэвлэмэл маягтыг хулгайлсан, устгасан гэх хэргээр арван жил 10 хоног хорих ялыг чанга дэглэмтэй хорих ангид эдлэхээр шийтгэгдсэн нэгэн аж. Тэрбээр суллагдахад дөрвөн жил дөрвөн сарын хугацаа  дутуу байхдаа ийнхүү оргосон байна.