Монгол Улсын Ерөнхийлөгч Ц.Элбэгдорж Киргиз Улсад хийж буй албан ёсны айлчлалынхаа үеэр тус улсад аж төрж буй Халимаг иргэдийн төлөөлөлтэй уулзлаа. Халимаг иргэдийн зарим нь торгууд хэлээр ярьж өөрсдийн ахуй амьдрал, удам угсаа, соёл уламжлалынхаа талаар дэлгэрэнгүй ярьж, бас Монгол Улсын тухай, цагаан сар, наадам гээд зан заншлаа хэрхэн хадгалж буй талаар асууж тодруулж байв.

Одоогоос 340 жилийн тэртээгээс энд суурьшин амьдарч эхэлсэн халимагууд нь Ижил мөрний хөвөө, Шинжааны Уйгараас нүүдэллэн ирж суурьшчээ. Киргизэд 12.000 гаруй халимаг амьдардаг юм байна. Халимагууд өөрсдийгөө Сарт халимагууд хэмээн нэрийдэн Киргизийн гурван гацаанд төвлөрөн сууж буй ажээ. Сарт халимагууд мал аж ахуй эрхлэхээс гадна амьжиргааны гол сурвалж нь газар тариалан юм. Нэг халимаг өрх дунджаар 100-300 орчим толгой мал малладаг байна. Мөн тэд тариа ногоо, жимс жимсгэнэ тарьж аж ахуйдаа нэмэрлэдэг байна. Бүгд лалын шашинтай юм. Халимагууд энд ирж суурьшаад таван үе болсон тул эх хэлээрээ тун бага, харин киргиз, орос хэлээр түлхүү ярьдаг байна.