УИХ-ын чуулганы өнөөдрийн нэгдсэн хуралдаанаар Байгаль орчны чиглэлийн багц хуулийн төслүүдийг хэлэлцэх байсан ч УИХ-ын гишүүн Д.Загджав, Ч.Улаан, С.Эрдэнэ нар Орон нутгийн сонгууль, УИХ-ын сонгуульд нэмэлт өөрчлөлт оруулах тухай асуудлыг хэлэлцэхийг санал болгон улмаар гишүүдийн 79,5 хувийн саналаар хуралдаан завсарлаад байгаа юм. Төрийн байгуулалтын байнгын хороо хуралдаж уг асуудлыг шийдвэрлэхээр болсон ч ажлын хэсэг эхэлж уулзах тул  хурлын тов одоогоор гараагүй байна.

Энэ завсар УИХ-ын дэд дарга Н.Энхболд сэтгүүлчдэд товч мэдээлэл хийлээ. Тэрбээр гишүүдээс гарсан саналыг дэмжиж Орон нутгийн сонгуулийн хуулийг шуурхай хэлэлцэх шаардлагатай гэв.