Монголын сагсан бөмбөгийн холбооны 17 дахь удаагийн лигийн гуравдугаар тойргийн тоглолт лхагва гаригт Спортын төв ордны “А” зааланд үргэлжиллээ. Энэ өдрийн тоглолт лигийн дөрвөн удаагийн аварга “Энержи ресурс” компанийн “Харцага” мөнгө, хүрэл медальт, “Бридж констракшн”-ы “Баянзүрх Буллз”-ын хооронд болов. Тоглолт дөрвөн үеийн турш сонирхолтой өрнөж, “Харцага” хүчтэй өрсөлдөгчөө 56:52-оор буулган авлаа. Тэд ялалт байгуулснаар “Бухнууд”-тай оноо тэнцэв.

Дараагийн тоглолт ШШГЕГ-ын “Сүлд” спорт хорооны “Офицерууд”, “TLG-13”-ын хооронд өрнөлөө. Хэрэв энэхүү тоглолтод “TLG-13” хожигдол хүлээвээс плей-оффт өрсөлдөх эрхгүй болох байв. Тиймээс тун хариуцлагатай тоглолт тэднийг хүлээж байв. Дөрвөн үеийн турш сонирхолтой өрсөлдөөнтэй өрнөсөн тулааны ялагчаар “TLG-13” тодорлоо. Тэд “Офицерууд”-ыг 83:82-оор буулган авснаар зургаа дахь ялалтаа байгуулав.

Лигийн гурван удаагийн аварга “Хас” банкны “Хүлгүүд” “Пэпси супер лиг” эхэлснээс хойш ердөө ганцхан ялалт байгуулаад буй ШУТИС-ийн “Шаркс”-ын тулаан сүүлийн тоглолт байлаа. Тус тоглолтод “Хүлгүүд” өрсөлдөгчөө 20 гаруй онооны зөрүүтэй буулган авлаа.