“Олон нийт цагдаагийн хамтын ажиллагаа“ хөтөлбөрийн хүрээнд 2012 оны эхний улиралд явагдаж байгаа “Иргэдийн оролцоо” нэртэй аяны эхний сарын дүн гарсан байна. Монгол Улсын Засгийн Газраас “Олон нийт цагдаагийн хамтын ажиллагаа” хөтөлбөрийг 2011 оны гуравдугаар сард баталсан юм. Уг хөтөлбөр нь иргэд, олон нийтийг гэмт хэрэгтэй тэмцэх, урьдчилан сэргийлэх үйл ажиллагаанд оролцуулж, өөрсдийн амьдрах аюулгүй орчныг бүрдүүлэхэд хүн бүр хувь нэмрээ оруулж, цагдаагийн байгууллагатай хамтран ажиллах нийгмийн ухамсарыг бий болгоход чиглэгдэж байгаа юм.

Энэ хөтөлбөрийн хүрээнд өнгөрөгч онд цагдаагийн байгууллагаас 1-2 сарын хугацаатай дөрвөн төрлийн аяныг иргэд олон нийтийн оролцоонд түшиглэн зохион байгуулж дүгнэсэн юм. Энэ оны эхний улиралд “Иргэдийн оролцоо” нэртэй хоёр сарын аяныг хоёрдугаар сараас эхэлсэн бөгөөд эхний сарын ажлын дүн гарчээ.

Өнгөрөгч сарын хугацаанд хийгдсэн хамгийн гол ажлуудын нэг нь иргэд өөрсдийн амьдарч буй баг, сум, хороондоо гэмт хэрэг, зөрчилтэй тэмцэрх, түүнээс урьдчилан сэргийлэх зорилго бүхий сайн дурын бүлэг, зөвлөлөө байгуулж, гишүүдээ сонгосон байна.

Иргэдийн сайн дурын бүлэг, зөвлөлийн үйл ажиллагааг дэмжин төр захиргааны байгууллага, Иргэдийн хурлаас нээлттэй хэлэлцүүлэг, зөвлөгөөн, сургалтуудыг аймаг,  дүүрэг бүрт явуулжээ.