УИХ-ын чуулганы үдээс хойшхи хуралдаан эхэллээ. Чуулганы нэгдсэн хуралдаанд 40 гишүүн оролцож байгаа юм. Энэ удаагийн чуулганаар УИХ-ын Тусгай хяналтын дэд хорооны бүрэлдэхүүнд өөрчлөлт оруулах тухай асуудлыг авч хэлэлцэн, баталлаа. Ингэснээр УИХ-ын гишүүн Н.Ганбямба нь УИХ-ын Тусгай хяналтын дэд хорооны гишүүнээр томилогдлоо.

УИХ-ын Тусгай хяналтын дэд хорооны дарга Э.Мөнх-Очир нь УИХ-ын Аюулгүй байдал, гадаад бодлогын байнгын хорооны даргаар томилогдсон тул шинээр гишүүнийг томилох шаардлага гарсан байна. Тиймээс УИХ дахь МАН-ын бүлэг энэ асуудлыг авч хэлэлцээд, УИХ-ын гишүүн Н.Ганбямбыг Тусгай хяналтын дэд хорооны гишүүнээр томилуулахаар болж, холбогдох байнгын хороонд санал дүгнэлтээ хүргүүлсэн. Уг санал дүгнэлтийг УИХ-ын Аюулгүй байдал, гадаад бодлогын байнгын хороо нь өнгөрсөн хоёрдугаар сарын 13-ний өдрийн хуралдаанаараа хэлэлцээд дэмжиж, чуулганы нэгдсэн хуралдаанд оруулахаар тогтсон байсныг ийнхүү өнөөдөр хэлэлцэн дэмжиж, баталлаа.

Одоо чуулганаар Байгаль орчныг хамгаалах тухай багц хуулийн төслийг хэлэлцэж эхлээд байна.