Хил хамгаалах ерөнхий газраас Монгол Улсын иргэдийг хилээр хөнгөлөлттэй нөхцлөөр нэвтрүүлэх шинэ журам гарсантай холбогдуулж мэдээлэл хийлээ.

Улсын хил, боомтоор өдөрт 5000-8000 гаруй хүн зорчдог гэнэ. Эдгээр зорчигчийг шалгах ажлаар өдөрт 8-10 байцаагч ажилдаг. Улсын хил боомтоор гарч орох тоолондоо шалган нэвтрэх хуудас бөглөдөг нь их чирэгдэл учруулж, дараалал үүсгэдэг байна.

Харин 2012 оны дөрөвдүгээр сарын 15-наас эхлэн энэ журмыг өөрчлөн цахим сүлжээнд оруулжээ.

Ингэснээрээ эдийн засгийн хувьд ч тэр цаг хугацааны хувьд ч хэмнэлттэй, иргэдийг чирэгдүүлэхгүй байх бүхий л бололцоо бүрдэж байгаа юм байна.

Удахгүй Улсын бүртгэлийн газраас олгох цахим үнэмлэхний мэдээлэлийг сүлжээтэй холбохоор иргэдийн мэдээлэл давхар бүртгэгдэж, бүр ч хялбар болох ажээ. Хилээр гарч орохын тулд бөглөдөг хуудсанд жилд ойролцоогоор 20 гаруй сая төгрөг зарцуулдаг аж. Харин гадаадын иргэдийн хувьд деклараци бөглөдөг хуучин журам хэвээрээ үйлчлэх юм байна.