Хуурамч хувьцаа гарган 1200 гаруй хувьцаа эзэмшигчдийг хохироосон “Анод” банкны захирлуудад холбогдох хэргийн мөрдөн байцаалтын ажиллагаа багагүй хугацаанд сунжирч байна.  Өнгөрсөн оны арваннэгдүгээр сард  Чингэлтэй дүүргийн шүүхээс нэмэлт мөрдөн байцаалтад буцсан уг хэргийг  шалгаж дуусаад нийслэлийн Прокурорын  хяналтад шилжүүлжээ. Прокуророос хэргийг гүйцэд шалгасан хэмээн үзэж энэ долоо хоногт багтаан Чингэлтэй дүүргийн шүүхэд шилжүүлэх юм байна.

Дөрвөн сарын хугацаанд нэмэлт мөрдөн байцаалт явуулж банкнаас зээлдэгчдийн зээлийн нөхцөл, барьцаа хөрөнгийн хэмжээ ямар байсан зэргийг шалгажээ. Анодын гэх тодотголтой энэхүү хэрэгт  тус  банкны ТУЗ-ийн гишүүн Л.Уламбаяр, Н.Даваа, Э.Гүр-Аранз, Д.Энхтөр нарын албан тушаалтнууд яллагдагчаар татаад байгаа. Тэдэнд Эрүүгийн хуулийн тусгай ангийн 148.4  иргэдэд хувьдаа  борлуулж мөнгө залилан авч хувьдаа ашигласан,  150.3  буюу банкны эд хөрөнгийг завшсан, 156.3 буюу банкны хууль тогтоомжийг зөрчсөн  гэх үндэслэлээр буруутгаж байгаа.