Венесуэль улсын Ерөнхийлөгч Уго Чавесийн биеийн байдал улам муу­даж эхэллээ. Түүнийг Куба дахь эмнэлэгт өчигдөр хүргэсэн байна. АНУ-ын иргэншилтэй, Венесуэль га­ралтай эмч Хосе Рафаэль Маркина “Венесуэлийн Ерөнхийлөгч Уго Ча­весийн хувьд амьдрах хугацаа нь долоон сараас илүүгүй болсон” хэ­мээжээ. Маркина эмч Венесуэлийн Ерөнхийлөгчийн эрүүл мэндийн байдалд онош тавьдаг, Уго Чавест үзлэг хийдэг Ку­ба болон Каракаст эмч нарын багийг ахалдаг цорын ганц хүн юм. Түүний хэлж буйгаар маш ховор тохиолддог арьсны хорт хавдрын шинж тэмдэг Уго Чавест өмнө нь илэрсэн аж. Энэ төрлийн хавдрын хэмжээ зарим тохиолдолд 20 см-т хүрч томордог байна. Өнгөрсөн хоёрдугаар сард Уго Чавесын гэдсэнд мэс засал хийж, хорт хавдрыг нь авсан юм. Тэрбээр өнгөрсөн оны зун иймэрхүү төрлийн мэс засал хийлгэж байсан удаатай. Үүний дараа Чавес Кубын нийслэлд гурван долоо хоногийн турш мэс заслын дараах нөхөн сэргээх эмчилгээ хийлгээд эх орондоо ирж байсан. Одоо тэрбээр туяаны эмчилгээ хийлгэж байгаа ба Кубыг дахин зорьжээ. Хосе Рафаэль Маркина “Хорт хавдрынх нь өсөлтийн хурдцаас дүгнэвэл, Чавесын амьд явах хугацаа 6-7 сараас хэтрэхгүй. Түүнд найдвар тун бага байгаа” хэмээн мэдэгджээ. Түүний таамаглаж байгаагаар, Уго Чавес сайндаа л ирэх оны дөрөвдүгээр сар хүртэл амьд явна гэдгийг онцолсон аж.

Венесуэльчүүдын санааг улсынх нь Ерөнхийлөгчийн биеийн байдал зовоож байгаа. Үүний хажуугаар Ла­тин Америкийн холбооны удирд­лагууд ойрын хугацаанд яаралтай хурал­дахаар болсон байна. Энэ оны арав­дугаар сарын 7-нд Венесуэльд Ерөнхийлөгчийн ээлжит  сонгууль болно. Уго Чавес сөрөг хүчнээс нэр дэвшигч Энрик Каприлестэй өр­сөлдөхөөр болсон. Өөрөөр хэлбэл, Венесуэль улсын ирээдүйг сөрөг хүчний лидер Энрик Каприлес удирдана гэхэд хилсдэхгүй. Түүний хувьд 39 настай, Ардчилсан холбоо намын нөлөө бүхий нэгэн. Ирэх аравдугаар сард болох Ерөнхийлөгчийн сонгуулийн урьдчилсан санал хураалтад 64.2 хувийн саналтай дараагийн ша­танд тэнцсэн. Өөрөөр хэлбэл, Уго Чавестай өрсөлдөх хүн байхгүй. Харамсалтай нь одоогийн Ерөнхийлөгчийн би­еийн байдал тааруу байгаа учраас Энрикийг да­раагийн Ерөнхийлөгч гэсэн албан бус яриа газар авсан талаар BBC агентлаг онцолсон аж. Түүний хувьд Уго Чавесийг хүндэлдэг боловч үзэл бодлын хувьд эсрэг тэсрэг байр суурьтай аж. 

Венесуэлийн Ерөнхийлөгч Уго Чавесийн биеийн байдал таа­руу байгаатай холбогдуулан Латин Амери­кийн холбоо ирэх сард хурал зарласан билээ. Ажиглагчид “Энэ хурлын үеэр тус холбооны ирээдүйн талаар санал бодлоо хуваалцах, магадгүй шинэ удирдагчаа сонгох байх” гэсэн таамаг дэвшүүлж байгаа юм.

Венесуэлийн тусгаар тогтнолын 200 жилийн ой хоёр жилийн өмнө тохиож байсан. Тэгвэл энэ сарын 19-нд тусгаар тогтнолынхоо 202 жилийн ойг тэмдэглэнэ. Ерөнхийлөгч Уго Чавес ой тэмдэглэх ёслолын ажиллагааг нээх хүсэлтэй байгаагаа өнгөрсөн долоо хоногт мэдэгдсэн. Одоогоос хоёр жилийн өмнө то­хиосон 200 жилийн ойн ёслолын ажил­лагаанд Куба, Аргентин, Бо­ливи, Никарагуа, Доминикан улсын төрийн тэргүүнүүд, Доминикан, Ан­тигуа ба Барбадос, Сан Висенте Грана­динес улсын Ерөнхий сайд нар байлцаж байсан. Энэ нь Латин Америк холбооны ихэнх улс орнуудын төлөөлөл юм.

Уго Чавес “Одоогоос 200 гаруй жилийн өмнө манай ард түмний үндэсний тусгаар тогтнолын төлөөх тэмцэл эхэлсэн түүхтэй. Биеийн байдал маань тааруу байгаа ч би эрүүл саруул байхын тулд бүхнийг хийх болно гэдгээ хэлмээр байна. Каракас бол эрх чөлөөний төлөөх тэмцлийн өлгий хот. Энэ тэмцлийн оч бусад газарт түгэн дүрэлзэж буй” хэмээн онцлон хэлжээ.

Кубын хувьсгалын лидер хорт хавдар авахуулах мэс засалд да­хин орж магадгүй талаар албаны эх сурвалж мэдэгдсээр байна. Ве­несуэлийн Мэдээлэл, холбооны сайд Андрес Исарра “Кастро, Чавес нар хоёр цаг орчим утсаар ярьсан. Уго Чавесийн бие тун тааруу байгаа нь царайнаас нь анзаарагдсан. Ве­несуэльчүүд түүний төлөө залбирч байгаа” хэмээн мэдэгдсэн байна. Уго Ча­весийн хэвтэж буй эмнэлгийн өрөө­ний хананд Венесуэлийн үндэс­ний баатар Симон Боливар, Кубын үндэсний баатар Хосе Марти хоёрын зургийг өлгөсөн байжээ.

Венесуэлийн дэд ерөнхийлөгч Элиас Хосе Хауа Милано “Чавес  бидэнтэй урт хугацаанд хамт байх болно. Тэр тэмцлээ үргэлжлүүлэхийн тулд бие нь сайжирч байгаа. Ерөнхийлөгч Чавес мэс заслын дараа илаарших болно. Дайснууд дэмий л баярлаж байна даа. Харин найз нөхөд нь санаа зовохоо болих хэрэгтэй. Ерөнхийлөгч Чавесийн зүгээс эрүүл мэндийнхээ төлөө хийж байгаа тулаан бол бид бүгдийн амьдрал, манай эх орны ойрын ирээдүйн төлөө бидний хийх тулалдаан юм. Чавес  амьдралынхаа төлөө тэмцэж байна. Бидний төлөө ч тэмцэж байна” хэмээжээ. Харин Уго Чавес Кубад ир­снийхээ дараа “Миний бие удахгүй сайжрах болно. Би ард түмэндээ сайхан амьдрал, сайхан ирээдүйг бүрдүүлж байж санаа амрах болно. Одоо хийлгэх гэж буй мэс засал нь хорт хавдрын хоёр дахь үе шатны эмчилгээ гэж ойлгож болно. Эрчимт эмчилгээний нэг хэсэг юм. Ямар ч байсан мэс засалд орсны дараа ирэх аравдугаар сард болох Ерөнхийлөгчийн сонгуульд дахин ялна гэдэгт итгэлтэй байна. Өмнө нь би “Хорт хавдраасаа бүрэн  ангижирлаа” гэж байсан. Энэ удаагийн эмчилгээ онцын санаа зовох зүйлгүй гэж ойлгож болно” хэмээн мэдэгдсэн байна.

Ирэх аравдугаар сард болох Ерөнхийлөгчийн ээлжит сонгуулиар Венесуэлийн ард түмэн нийгмийн өөрчлөлтийг хүсэж байгаагаа илэрхийлсэн. Нийгмийн өөрчлөлт гэж зарим хотын дэд бүтэц, цэвэр ус, цахилгааны тогтвортой хангамж, төрийн албаны хурдан шуурхай үйлчилгээ, нийгэмд тулгараад буй асуудлыг шийдвэрлэх зөв гарцыг олох хэмээн тайлбарлаж буй. Ямартай ч Уго Чавесийн эрүүл мэндийн байдал сайжирвал Ерөн­хийлөгчийн сонгуульд ялалт бай­гуулах магадлал өндөр байгаа та­лаар Венесуэлийн Сонгуулийн хо­рооныхон мэдэгдэж буй. Уго Чавесийн эрүүл мэндэд санаа зовсон 27 сая венесуэльчүүд энэ амралтын өдрүүдэд 1000 лаа асаах талаар “Latinonews” агентлаг мэдээлэв.