“Н.Жанцанноров” сангаас ерөнхий боловсролын сурагчдын дунд “Япон дууг хэн сайн дуулах вэ?” уралдааныг зохион байгуулах гэж байна. Монгол-Япон улсын хооронд дипломат харилцаа тогтоосны 40 жилийн ойн хүрээнд Японы нэрт хөгжмийн зохиолч Эндо Минорүгийн  үүсгэн байгуулсан “Эндо Минорү” сангийн санаачлага, ивээн тэтгэлгээр монголын хөгжмийн зохиолч Н.Жанцанноровын үүсгэн байгуулсан “Жанцанноров сан”   хамтран тус уралдааныг зохион байгуулах юм. Уралдаан гурван үе шатаар шалгаруулах юм. Уралдааны журам болон шалгаруулалтын талаарх мэдээллийг хүргэж байна. Уралдаанд амжилттай оролцог нэгдүгээр байрт шалгарсан хүүхдэд Эндо Минорүгийн нэрэмжит шагнал 1000.000 төгрөг, хоёрдугаар байр 700.000 төгрөг, гуравдугаар байр 500. 000 төгрөг, тусгай байр 300.000 төгрөгөөр тус тус шагнах юм.

1-р шат:

1.    Эндо Минорүгийн зохиол “Хойт нутгийн хавар”
2.    Өөрийн сонголтоор нэг япон дуу

Журам: Сургууль тус бүр, аймаг тус бүр сурагчдынхаа дунд япон дууны уралдаан явуулж 2 хүүхдийг сонгон материалыг нь зохион байгуулах хороонд ирүүлнэ.

Ирүүлэх материал: “Хойд нутгийн хавар” болон өөрийн сонголтоор нэг япон дууг нэмж сонгон ямар нэг дагалдах хөгжимгүй дуулсан 2 дууныхаа бичлэг / CD, хуурцаг аль ч хэлбэрээр байж болно/, товч анкетыг бүрдүүлэн / 3х4 хэмжээтэй 2 хувь зураг/ 2012 оны 5 р сарын 10-ны дотор зохион байгуулах хороонд  сургуулийн сургалтын менежер нь авч ирж бүртгүүлнэ.

2-р шат:

Журам: Сургуулиудаас ирсэн бичлэгийг уралдааны шүүгчийн бүрэлдэхүүн сонсож, 30 хүртэл хүүхдийг сонгон, 3 р шатанд оролцох эрх олгосон тухай 2012 оны   5-р сарын 15 ны дотор эргэж мэдэгдэнэ.

3-р шат:

1.    Эндо Минорүгийн зохиол “ Хойт нутгийн хавар”
2.    Өөрийн сонголтоор зохион байгуулах хорооноос түгээсэн дуунуудаас нэг япон дуу сонгон дуулна / 5 дууны нот, cd тараана /

Журам: 3-р шатанд тэнцсэн сурагч дуулах 2 дуугаа  төгөлдөр хуур, бусад дагалдах хөгжимтэй хамтран дуулж болохоос гадна тухайн дуунуудынхаа хөгжмийн  бичлэгийг дагаж дуулж болно. Жич: орон нутгийн шалгарсан сурагчид зардлаа өөрсдөө даана.

3-р шатны уралдаан ирэх зургадугаар сарын  2 -нд Монголын хүүхдийн ордонд болох юм. Дэлгэрэнгүй мэдээллийг 89242525, 93132525 утсаар лавлаж болно.