Хууль зүй, дотоод хэр­гийн сайд Ц.Нямдорж “Тө­рийн ор­донд байгаа балиар юм­нуудын хажуугаар би хэзээ ч дуугүй өнгөрч чадахгүй. Гэхдээ би байдаг л юм бол шүү дээ. На­даас салах аргыг нь би зааж өгөөд байгаа юм. Юу гэхээр ча­дал чинь хүрвэл миний аминд халд гэж. Өөрөөр та нар миний амыг хааж чадахгүй. Ямар ч арга байхгүй шүү” гэж хэлжээ. Монголын хууль хяналтынхныг толгойлдог хүний хувьд мөн айхтар үг хэлсэн байгаа биз. Хэдэн сэт­гүүлчтэй “Сэтгүүлч ба сайд” нэвт­рүүлэгт оролцож, асуултад нь хариулж байгаа, сэтгүүлчдийг доош хийсэн нь таалагдсангүй. Гэхдээ ганц надад бус олон хүнд таалагдаагүй гэдэгт итгэлтэй байна. Ц.Нямдорж Х.Баттулгатай хэвлэлээр цэц булаацалдаж болно. Үүнийг  хэн ч хориогүй, хорих ч үгүй. Гэхдээ бас хэлж байгаа үг, үйлдлээ хянамаар юм. Хууль зүй, дотоод хэргийн сайд байж телевизээр зарим хүнийг заналхийлээд байгаа юм уу, дарамтлаад байгаа юм уу. Гар, хуруугаараа заагаад л, асуулт асуусан сэтгүүлчээ юу ч мэддэггүй юм шиг аашилсан нь эгдүүцмээр. Ер нь Ц.Нямдоржийн ярьсан бүхэн уншсан ном шиг болчихож. Ийм байхад хүмүүсийг залхтал нь яриад л байх юм. Үүнийхээ оронд ядаж өөртөө дүгнэлт хийдэггүй юм байх даа. Тэрбээр “Би Баттулга мэтийн хүмүүстэй зууралдаж улс төр хийдэг хүн биш. Энэ төрд шургалсан хүмүүсийн дэндүү болчимгүй үйлдлийг л ил гаргаж хэлсэн. Үнэнийг нь хэлсний төлөө над руу  элдэв муу аргаар эргээд ноцдог шүү дээ. Магадгүй энэ миний, өдгөө албан тушаал хашиж байгаа үеийн хувь тавилан байх. Монгол төрийн сайдын суудалд зөв суугаарай гэдгийг Л.Гүндалайд ч хэлж байсан удаатай. Цаашдаа ч хэлнэ” гэсэн байх юм. Яг үнэндээ Ц.Нямдорж яриад байгаа хүмүүстэйгээ адил улс төр хийгээгүй гэж үү. Таны өгсөн ярилцлагаас чинь харахад бүх зүйл тодорхой байна шүү дээ.

Ц.Нямдорж сайд аа, таныг хэдэн жилийн өмнө ингэж ярихад чинь Монголын ард түмэн “Шударга улстөрч” гэж хүлээж авдаг байсан байж болно. Харин одоо хүмүүсийн үзэл бодол, улс төрийг ойлгох ойлголт бүгд цаг хугацааг даган өөрчлөгдсөн. Үүнийг ойлгоод авчихад илүүдэхгүй болов уу. Улс төр гэж чухам юу юм бэ. Туршлагатай улстөрчийн хувьд та мэдэхгүй байна гэж байхгүй. УИХ-ын гишүүн Х.Баттулга сонгууль дөхөж байгаа энэ үед улстөржиж болно. Харин эрхэм сайд та бүгдийг ном журмынх нь дагуу хийж, улс төр хийгээгүй л юм бол байсхийгээд хэвлэлээр мэдээлэл цацахгүй байсан биз ээ.

Хууль зүй, дотоод хэргийн сайд Ц.Нямдорж зөвхөн Х.Баттулга руу дай­рахыг хүссэнгүй. Тэрбээр “УИХ-ын гишүүн, сайд нар зөвхөн өрсөл­дөгчдөө Авлигатай тэмцэх газарт өгдөг, өрсөлдөгчдийнхөө талаар матаас бичиж өгдөг хүмүүс биш шүү дээ. З.Энхболдоос эхлээд хэдэн хүн УИХ-д бий. Захиалга өгч, өрсөлдөгчөө шалгуулаад, дарж авахыг оролд­дог. Түүндээ хууль хяналтын байгуул­лагыг ашигладаг балиар арга бий бол­чи­хоод байна” гэж хэлснээрээ З.Энх­болдыг ч уурлууллаа. Хэрэв Ц.Ням­дорж жинхэнэ ёс суртахуунтай улстөрч байсан бол улс төрд хамт зүтгэж байгаа хүнээ бие бялдраар нь гутаах үг хэлэхгүй байсан болов уу. Хэн нэгнийг хэл амаар хэрхэн доромжилж болдгийг яруу тодоор харуулж чадсан хүн бол Ц.Нямдорж. Бас болоогүй өөрийгөө хаана ч байхгүй сайн хуульч гэж магтах юм. Монгол Улсын бараг бүх хуулийг өөрөө санаачилсан болохоор маргаж, мэтгэлцэх хүн гарахгүй гэсэн. Гэвч түүний үнэн нүүр царай Монгол Улсын хуулийг дур мэдэн зассан гэдгээс харагдана. Мөн тэрбээр сонгууль бүрийн өмнө ямар нэгэн дуулианы эзэн болдог. Өөрөө ч хүлээн зөвшөөрдөг юм билээ. “М.Энхсайханы Засгийн газрын үе буюу 1998 онд УИХ-ын гишүүдийг тагнаж, чагнасан хэргийг тухайн үеийн УИХ-ын гишүүн О.Дашбалбар, С.Зориг, Р.Одонбаатар, Ц.Нямдорж нар шалгасан. Энэ үеэс улс төрийн өс хонзон эхэлсэн” гэж Ц.Нямдорж ярив. Түүнчлэн “Одоо О.Дашбалбар, С.Зориг нар байхгүй. Р.Одонбаатар хаана яваа юм, мэдэхгүй. Ардчилсан нам УИХ-д ганц суудалтай үлдсэн учир бүгдээрээ Америк руу суралцах нэ­рийдлээр гараад явчихсан. Цагдаа нь эрүүгийнхний гарт орчихсон, Монголыг 1990-ээд оны Орос орон болгох тийм нөхцөл байдалтай бай­хад цагдааг надад хүлээлгэж өгсөн. Үүний да­раа манай цагдаагийнхан эрүүгийн чиг­лэлээр айлгаж, дарамталдаг хэр­гүүдтэй тэмцсэн. Энэ хонзон чинь 2003 онд М.Энхсайханаар дам­жиж намайг гадаадын тагнуул бол­гох ар­гаар илэрсэн. Л.Гүндалай бол­гоомж­гүй, гэнэн тулдаа түүнийг гар­гаж тавьсан болохоос биш цаад талдаа хоёр том бүлэглэлийн хариу над дээр ир­сэн нь тэр” гэсэн юм. Энэ бүгдийг дахин, дахин ярьж, өөрийнхөө үглээ занг хүмүүст мэдрүүлж байх шиг.

Ц.Нямдорж Х.Баттулгыг “Төрд ажил­ласан туршлага, хуулийн мэдлэ­гээрээ миний хажууд хэн ч биш. Түүн­тэй суугаад халз мэтгэлцэх нь ми­ний хувьд хэтэрхий доошоо ор­сон хэрэг болно. Тэр хүн ер нь хууль уншиж үзсэн юм уу, үгүй юү. Ганц, хоёр хуулийн нэрийг бол тогтоосон юм шиг байна лээ” гэ­сэн. Мөн захын наймаачин гэж Х.Баттулгыг хэлж болохгүй байх аа. Ц.Нямдорж наймаачин хүн гэд­гийг чухам хэн гэж боддог юм бэ. Ту­хайн үед ганзагын наймаачид л мон­гол­чуудыг тэжээж тэтгэж байсан биш үү. Нэмж хэ­лэхэд энэ нийгэмд түрээсийн бай­ранд амьдардаг, сайн хуульч Ц.Ням­доржийг хэн хөнөөх гээд байгаа юм бол. Гайхалтай нь хэн нэгэн одоо­гоор ийм зүйл яриагүй байхад өөрөө санал болгоод байгаа юм уу. Ер нь энэ Ц.Нямдоржоос залхаж бай­на. Одоо ингээд зогсчихвол яасан юм. Хүмүүст шударга хүн болж хараг­дах гэж худал жүжиглэхээ боль. Улстөр­чид бүгд л адилхан гэдгийг ард түмэн мэднэ.