Дөрвөн хүний амь нас хөнөөсөн, хүчингийн хэрэг үйлдсэн Б.Эрдэнэбилэг, түүний  хамсаатан Ш.Гантулга  нарын  хяналтын шатанд гаргасан гомдлыг өнөөдөр  хэлэлцэж, шүүх бүрэлдэхүүн дөнгөж сая  шийдвэрээ гаргалаа. Шүүх бүрэлдэхүүн хэлэлцээд анхан болон давж заалдах  шатнаас Б.Эрдэнэбилэгт оноосон цаазаа авах ял, Ш.Гантулгад оноосон 16 жилийн хорих ялыг хэвээр үлдээжээ. Хяналтын  шатны шүүх өмнөх шатны шүүх хууль зөв хэрэглэсэн,  эрүүгийн байцаан шийтгэх хууль зөрчөөгүй, уг хэрэгт хангалттай нотлох баримт  бүрдсэн гэж үзсэн  байна.

Б.Эрдэнэбилэгт Баянзүрх дүүргийн шүүхээс дөрвөн хүний амь хөнөөсөн хэмээн Эрүүгийн хуулийн 91.2.1, 91.2.6, 91.2.7, 91.2.10, 91.2.12, 91.2.15, 91.2.16, 126.2.1, 147.2, 181.2.1, 181.2.5, 216.1 гэсэн 12 зүйл ангиар буруутгасан бол Б.Эрдэнэбилгийн 2009 онд үйлдсэн хэрэгт хамсаатнаар оролцсон гэх Ш.Гантулгад хүний амь нас санаатай хөнөөсөн гэх зүйлчлэлээр буруутгажээ. Хэдийгээр тэд шүүхийн шийдвэрийг хүлээн зөвшөөрөхгүй Нийслэлийн давж заалдах шатны шүүхэд хандсан ч өнгөрсөн сард тэдэнд оноосон ялыг хэвээр үлдээсэн.

Б.Эрдэнэбилэг гэгч нь  2009 онд  найз М-ийн амь насыг хөнөөсөн бөгөөд энэ хэрэгтээ Ш.Гантулга гэх залууг оролцуулсан байна. Уг хэрэг шүүхээр эцэслэн шийдэгдэхгүй явсаар хоёр жил гаруй болж, түүнийг батлан даалтад гаргасан. Гэвч тэрбээр батлан даалтад гараад удаагүй байхдаа Баянзүрх дүүрэгт  гэр бүлийн гурван хүнийг/аав, ээж, охин/  онц хэрцгийгээр хөнөөсөн гэмт хэргийг үйлдсэн юм.