Нефть импортлогч “Петровис” компани өнөөдөр АИ-92 бензины үнийг литр тутамд нь 100 төгрөгөөр хямдруулахаар болсон байна. Энэ талаар тус компанийн мэргэжилтэн “АИ-92 шатахууны үнийг өнөөдөр орой буулгана. Одоогийн байдлаар хэдэн цагт, ямар шалтгаанаар, хэдий хугацаанд буулгах зэрэг тодорхой мэдээлэл алга байна. Зөвхөн Улаанбаатар хотын хэмжээнд үнийг нь 100 төгрөгөөр буулгана” гэв.

Харин “Шунхлай”, “Магнай трейд”, “Сод Монгол” зэрэг бусад импортлогч компаниудын хувьд өнөөдрийн байдлаар түлш, шатахууны үнэ буулгах асуудал яригдаагүй гэсэн хариу өглөө.

2012 оны нэгдүгээр сарын 6-нд нефть импортлогч компаниуд бүх төрлийн шатахуун, түлшний үнийг литр тутамд нь 260 хүртэл төгрөгөөр нэмсэн. Тухайн үед АИ-92 шатахуун литр тутамдаа 1780 төгрөг болсон ч өнөөдрийг хүртэлх хугацаанд аажим, аажмаар буусаар өдгөө АИ-92 литр тутамдаа 1680 төгрөгөөр зарагдаж буй билээ.