Үндэсний сагсан бөмбөгийн холбоо (NBA)-ны улирлын тоглолт өндөрлөхөд арав гаруйхан тоглолт үлдээд байна. Өрсөлдөөн ширүүссэн энэ үед Дорнод бүсийн манлай баг “Чикаго Буллз” плей-оффт шалгарах болзлоо хамгийн түрүүнд хангалаа. Тэд 51 тоглолтоос 40 хожил авсан нь лигтээ тэргүүлэх үзүүлэлт юм. “Бухнууд” өнгөрсөн жил ч гэсэн плей-оффын эрхээ хамгийн түрүүнд авч байсан юм. Гэхдээ тэр үед Д.Рөүз бэртэл гэмтэлгүй байж багаа чирсээр плей-оффт шалгарсан билээ. Энэ үед “Чикаго”-г ганц хүнээс хэтэрхий хамааралтай баг хэмээн шүүмжилж байсан. Гэтэл энэ улиралд “Бухнууд” лидерийнхээ эзгүйд цөөнгүй ялалт байгуулж, жинхэнэ баг болж чадсанаа харуулав. улирлын дундуур “Майами Хит” тэдэнтэй ойролцоо үзэлцэж байсан ч яваандаа суусаар өдгөө гүйцэх боломжоо бараг гээжээ. Энэ бүсийн эхний наймд дээрх хоёр багаас гадна “орландо”, “Филадельфи”, “индиана”, “атланта”, “Бостон”, “Нью-йорк” жагсаж байна. Харин Өрнөдөд өрсөлдөөн ширүүн болохоор плей-оффт шалгарах баг ойрд тодрохгүй шинжтэй. Бүсийг тэргүүлэгч “оклахома”, наймдугаар байрын “Хьюстон” хоёрын хооронд ердөө 11 ялалтын зөрүү байгаа юм. 50 хувийн амжилттай “Финикс” 10-т жагсаж байгаа гэхээр Өрнөдөд ямархуу ширүүн тэмцэл өрнөж байгаа нь харагдана.