БНХАУ-ын Засгийн газрын хөнгөлөлттэй зээлээр Архангай аймгийн мах боловсруулах, хуурай сүүний үйлдвэр барихаар болжээ. Өндөр-Улаан суманд 2012-2015 онд барьж ашиглалтад оруулах мах боловсруулах үйлдвэр нь хоногт мянган бог, наян бод нядлах хүчин чадалтай ажээ. Бэлтгэсэн бод махыг өрөөлөөр нь бог малыг гулуузаар нь хөлдөөх бол үлдсэнийг нь ангилан савлах юм байна. Энэ үйлдвэрийг ашиглалтад оруулсанаар орон нутагт 159 хүн ажлын байраар хангагдана.

Архангай аймагт жилд дунджаар 80 сая литр сүү бэлтгэдэг аж. Эрдэнэбулган сум болон аймгийн төвд байгуулахаар төлөвлөсөн хуурай сүүний үйлдвэр нь хоногт 30 тонн сүү хүлээн авч боловсруулан жилд дунджаар 400 тонн хуурай сүү, 100 тонн цөцгийн тос, 80 тонн аарц үйлдвэрлэх хүчин чадалтай үйлдвэр юм байна. 2012-2014 онд дээрхи үйлдвэрийг байгуулсанаар орон нутгийн сүүний нөөцийг үр дүнтэй ашиглах, импортыг орлох бүтээгдэхүүний үйлдвэрлэлийг нэмэгдүүлэхээс гадна 40 гаруй хүнийг ажлын байраар хангаж, 1800 гаруй малчин өрхийн бодит орлогыг нэмэгдүүлэх боломж бүрдэх ажээ.