Хууль зүй, дотоод хэргийн сайд Ц.Нямдорж Зам, тээвэр, барилга, хот байгуулалтын сайд асан Х.Баттулгатай хэвлэлээр үзэлцэж буй. Энэ хэрүүлийг нь ч олон нийт чих тавин чагнаж байгаа. Гэтэл Хууль зүй, дотоод хэргийн сайд Ц.Нямдорж “Төмөр замын талаар төрөөс баримтлах бодлого батлагдсаны дараа Х.Баттулга сонинд ярилцлага өгөхдөө “Хоёр жилийн дотор энэ төмөр замыг барьж дуусгана” гэсэн. Ийм мэдэгдэл хийснийхээ дараа оросуудаас холдсон. Тэгээд сүүлд нь нууцаар Солонгос, Хятадын хамтарсан групптэй Төмөр зам байгуулах гэрээ гэсэн нууц гэрээ байгуулсан. Монголын талаас “Монголын Төмөр зам” компанийн захирал Б.Батзаяа гэдэг хүн оролцож Солонгост гэрээнд гарын үсэг зурсан. Энэ гэрээ 2011 оны гуравдугаар сарын 19-ний өдөр байгуулагдсан. Гэтэл өнөөдөр энэ гэрээг Монголд мэдэж байгаа хүн бараг байхгүй. Засгийн газар ч мэдэхгүй байна. “Монголын Төмөр замын дэд бүтэц” гэдэг компани Хонконгод байгуулагдсан гэдэг ч чухам хаана, юу хийгээд яваад байгаа нь мэдэгдэхгүй байна. Оросуудтай Тавантолгойн лицензийг барьцаалж гэрээ хэлэлцээ хийж байх үед БНХАУ-ын холбогдох яамны дэд сайд Монголд ирж Зам, тээвэр, барилга, хот байгуулалтын яамтай санамж бичигт гарын үсэг зурсан. Тэгээд тэр дэд сайд маргааш нь буцаж Бээжингийн онгоцны буудал дээр буухад нь л өчигдрийн зурсан санамж бичиг чинь хүчингүй шүү гэдгийг Монголын Элчин сайдын яамныхан мэдэгдсэн. Төмөр замын ийм ил далд гэрээнүүдээс болж Монгол Хятадын харилцаа туйлын түвэгтэй байдалд орсон” гэж хэлснээрээ буруутан болох нь тэр. Уг нь хэн, хаана, хэнтэй гэрээ хэлцэл хийж, гарын үсэг зурах гэж буй нь нууц баймаар. Хэрэв шаардлагатай бол олон нийтэд мэдээлэх учиртай. Гэтэл улс орны дотоод асуудал, Засгийн газрын түвшинд яригдах зүйлийг Хууль зүй, дотоод хэргийн сайд нь уурандаа гэх үү, сэтгэл хөөрлөөр гэх үү, ямартай ч үгэндээ дайчихав. Ц.Нямдорж сайдын энэ их тайлбарын цаана Х.Баттулгыг олон нийтэд “муу хүн” болгон харуулахыг зорьсон. Гэвч бүтэлгүйтэж, өөрөө болох, болохгүйг ярьчихлаа. Ямартай ч энэхүү гэрээ нь олон улсын гэх тодотголтой Монгол Улсын эрх ашгийг хөндсөн, геополитикийн асуудал учраас салбарын сайд хэвлэл мэдээллээр цацаж болох эсэх нь юу бол. Тэрбээр үүгээр ч зогсохгүй Засгийн газрын гишүүдтэйгээ зөвлөлдөхгүй, Х.Баттулгад уурласан уурандаа гүйж гараад хэвлэлийн бага хурал зарлачихсан. Үүнээс нь болоод түүний энэ бантанг Засгийн газрынхан хэрхэн зохицуулах аргаа хайж яваа аж.
Төрийн эрх барих дээд байгууллагад ажилладаг мөртлөө улстөрч хүнийхээ хувьд асуудалд хандаж, сэтгэл хөдлөлдөө автах нь зөв гэж үү. Учир нь уул уурхай, тэр дундаа Тавантолгойн ордоос үүдэн төмөр зам барих асуудал дэлхийн томоохон гүрнүүдийн анхаарлыг татаж байгаа энэ үед Засгийн газрын гишүүн “Төмөр замыг хамтарч барих асуудлаар ОХУ-ын Төмөр замын нийгэмлэгтэй удаа дараа ил, далд гэрээ хийсэн. В.И.Якунин Монголд 3-4 удаа ирж Монгол төрийн Ерөнхийлөгчөөс эхлээд Х.Баттулга хүртэл бүгдтэй нь уулзаж байсан бэ. Цаана нь юу явагдаж байсан гэхээр Тавантолгойн ордын ашиглалтын лицензийг Оросын талд өгч энэ үндсэн дээр хамтарсан төмөр зам барина гэдэг ил, далд яриа хэлэлцээрүүд явагдаж байсан” гэж хэлсэн нь бусдын анхаарлыг татахгүй байхын аргагүй биз. Ц.Нямдоржийн яриад байгаа бүхэн үнэн үү, худал уу гэдгээс үл хамааран Тавантолгой руу хошуурах гадныхны ил, далд өрсөлдөөнийг эрчимжүүлэх нь тодорхой. “Нуухыг нь авах гээд нүдийг нь сохлов” гэгчээр Х.Баттулгыг “хатгах” гээд нууцыг нууц биш болгочихов уу. Ер нь энэ хэрүүл Ц.Нямдорж, Х.Баттулга гэх улстөрчдийн харилцаа гэхээс илүүтэй улс орны геополитикийн нууц асуудалтай холбогдчихоод байна. Уг нь Засгийн газрын гишүүд танхимын зохион байгуулалттай байдаг. Засгийн газрын гишүүн хаана, юу ярьж болох, болохгүй вэ гэдгийг зөвшилцөх учиртай. Гэтэл Ц.Нямдорж тэгсэнгүй. Дур мэдэн, том толгойлсноос үүдэн Засгийн газрын нэр хүнд унахад хүрлээ. Өөрөөр хэлбэл, нэг сайдынхаа юу ярихыг хянаж чадаагүйгээс болж танхимаараа “шок”-нд орчихоод байна.
Ц.ЭНХЦЭЦЭГ"Улс төрийн тойм" сонин