Нийслэлийн Баянзүрх дүүргийн орос хэлний гүнзгийрүүлсэн сургалттай “Билгийн үүдэн” бүрэн дунд сургууль нь сансрын нисгэгч Ю.А.Гагарины нэрэмжит болжээ. Тус сургуулийн 4а ангийн сурагч Ө.Намуун сурагчдаа төлөөлж “Ю.А.Гагарины нэрэмжит сургууль болох зөвшөөрөл өгөөч ээ” гэсэн захидлыг Ю.А.Гагарины гэр бүлд илгээхэд охин Галина Гагарина зөвшөөрсөн байна.

Мөн Монголын анхны сансрын нисгэгч Ж.Гүррагчаагийн үзэсгэлэн музей тус сургуульд нээгдсэн байна. Уг арга хэмжээнд ЗХУ-ын болон БНМАУ-ын баатар Ж.Гүррагчаа, Баянзүрх дүүргийн Тамгын газрын дарга Д.Баатарням, ОХУ-аас Монгол Улсад суугаа Элчин сайдын яамны ажилтнууд, ОХУ-ын Монгол дахь боловсролын байгууллагын төлөөлөгчид оролцлоо. Музейд Ж.Гүррагчаагийн сансрын нислэгийн үеийн түүхэн зургийн цомог, багадаа хэрэглэж байсан эд зүйлийн загварыг дэлгэн тавьсан бөгөөд цаашид үзмэрээ баяжуулах ажээ.