Би нэг л замаар ажлаасаа гэр хүртлээ явдаг. Ингэхдээ өглөө ч орой ч нэг хүнийг “Сайн байна уу, аниа”, эсвэл “Баяртай, аниа” гэж хэлээд өнгөрдөг. Тэр хүн бол Шинжлэх ухаан, технологийн их сургуулийн хажууханд чихэр, бо­хины наймаа эрхэлдэг нэгэн эмэгтэй юм. Өвөл, зунгүй гадаа зогсож л байдаг. Цастай, бороотой, шуургатай байсан ч ха­маагүй ажлаа хийж л байдаг. Даарч бээрсэн гараараа хүмүүст авахыг хүссэн бүхнийг нь инээмсэглэн өгдөг тэр эмэгтэйг Б.Сэжидням гэдэг. Тэрбээр сүүлийн дөрвөн жил “Ширхэгийн наймаа” эрхэлж байгаа ажээ. Хүн гэдэг хэн нэгэн хүний төлөө амьдралаа зориулах тийм л хүсэл мөрөөдөлтэй амьдардаг амьтан. Түүнийг гадуурхах нэгэн байхад өрөвдөж хайрлах нэгэн бас байдаг. Түүний эрхэлж байгаа ажил хэдийгээр гадаа гандаж, хүйтэнд хөрдөг боловч бусдын адил амьдралаа залгуулах ггэсэндээ ийн хөдөлмөрлөж яваа нэгэн. Гэхдээ тэр энэ ажлаа голдоггүй. Ажил хүнийг голохоос хүн ажлыг голдоггүй гэдгийг Б.Сэжидням эгчээс тод харж болно. Түүний байнгын үйлч­лүүлэгчид Б.Сэжидням гэж нэрээр нь дуудахаас илүүтэй Түүнийг “Аниа” гэж авгайлдаг. Хүн бүртэй эелдэг, сайхан харьцдаг болохоор оюутан, залуус ч юм авахдаа сэтгэл хангалуун байдаг. Сайртсан хацар, хагарч эвэршсэн хуруу  бол эмэгтэй хүнд баймааргүй зүйл. Гэхдээ энэ чухал биш. Хамгийн гол нь хүний дотоод гоо сайхныг олж харж чадвал гаднах гоо сайхныг нь ч мэдэрдэг болов уу. Өдөр бүхэн тааралддаг аниагийн амьдралынх нь талаар ярилцах хүсэл өөрийн эрхгүй төрсөн юм. Түүнтэй адил хүн олон бий. Гагцхүү түүн шиг бодож, сэтгэдэг, ярьдаг нь хэр олон бол. Иймээс “Түмний нэг” буландаа түүнийг урьж, ярилцлаа. 
 
-Сайн байна уу. Тантай ярилц­маар байна. Та дургүйцэхгүй биз дээ. Та хэдэн жил наймаа эрхэлж байна вэ?

-Намайг Б.Сэжидням гэдэг. Эгч нь Шинжлэх ухаан, технологийн их сургуулийн хажууд юм ширхэглэн зардаг. Эгч нь энд дөрөв орчим жил болж байна. Манайх ам бүл тав. Гурван хүү, нэг охинтой. Хамгийн том хүү маань өнгөрсөн жил Монгол Улсын их сургуулийг төгссөн. Харин хоёр нь их сургуульд сурч байна. Бага охин маань арван жилийн сургуульд сурдаг. Эгч нь уг нь ОХУ-д нэхмэлийн үйлдвэрийн инженер мэргэжлийг эзэмшсэн хүн. Энэ мэргэжлээрээ ажиллах гэхээр нас нэлээд хэвийчихлээ. Бас нэхмэлийн үйлдвэр манай улсад хэд байдаг билээ дээ. Тиймээс хэдэн хүүхдийнхээ сайн сайхан амьдрахыг харахын тулд өвөл, зуныг ялгалгүй л зогсож байна. Сургалтын төлбөр, хичээлийн хэрэглэл гээд бишгүй асуудал тулгардаг. Энэ бүгд эгчийнх нь нуруун дээр буудаг юм.

-Та наймаанаасаа хэр хэмжээ­ний ашиг олдог вэ?

-Ер нь бол гайгүй шүү. Энэ хэдэн оюутан хүүхдүүд ирээд “Аниа” гээд л хэрэгтэй бүхнээ авдаг болохоор эгч нь болоод байдаг юм. Нуулгүй хэлэхэд хэдэн хүүхдүүдийнхээ буянд л өнгөтэй, өөдтэй амьдарч байна. Сүүлийн үед ашиг олоод нэг их гавихгүй болсон. Юм үнэд ороод хэцүү л байна.

-Та цаашид энэ наймаагаа хийх бодолтой байна уу. Өөр ямар нэгэн ажил хийе гэж бодож байв уу?

-Эгч нь одоо 49 настай. Ажил хайсан ч насыг маань голоод олдохгүй байх. Тэгээд ч иймэрхүү ажил хийсээр байгаад царай зүс ч үгүй болжээ. Хэдэн хүүхдийнхээ сайхан амьдрахыг хартлаа эгч нь энэ ажлаа хийх байх аа. 

-Энэ наймааг эрхлэхэд ямар нэгэн хүндрэл гарч байна уу. Тантай адил наймаа эрхэлдэг эмэгтэйчүүд олон байдаг?

-Хүндрэл ер нь бишгүй дээ л гарна. Гадаа хүйтэнд хөрч, халуунд халах нь мэдээж хэцүү. Тэгээд  зогсохгүй цагдаа, эрүүл мэндийн байгууллагынхан гээд олон бэрхшээл тулгардаг. Энэ бүгдийг даван туулж байж эгч нь өдий зэрэгтэй амьдарч явна. Гэхдээ ингэж зовлоо гээд эгч нь нэг ч удаа гутарч байгаагүй. Надад сайхан үр хүүхэд байна. Сайныг санаж явбал сайхан амьдарна гэдэгт итгэж явдаг юм. Надтай адил ийм наймаа эрхэлдэг хүн олон бий. Тэд ч гэсэн үр хүүхэдтэй хүмүүс биз. Дээр нь нэмж хэлэхэд тэд худлаа ярьж хулгай хийгээгүй л амьдарч байгаа юм шүү дээ.

Ийнхүү тэрбээр өөрийн амьд­ралын нэгээхэн хэсгээс ярьж, зовлон, жаргалаа надтай хуваалцсан юм. Түүний амьдрал одоогийнх шигээ ийм байгаагүй нь түүний ярианы өнгө, хэлж ярьж байгаагаас илт байлаа. Мэдлэг, боловсролтой дээр нь гадаадад мэргэжил эзэмшсэн хүн ийм ажил хийгээд явна гэдэг санаанд багтмааргүй. Гэхдээ хүний амьдрал тэр чигээрээ асуудал, бэрх­шээлээр дүүрэн байдгийг илтгэнэ. Б.Сэжидням эгч шиг наймаа эрхэлдэг зуу зуун эмэгтэй байгаа. Хүн гэдэг хүсэж байгаа бүхэндээ хүрэхийг тэмүүлж амьдардаг тийм л амьтан шүү дээ.