УИХ-ын сонгуулийн тухай хуульд улс төрийн намуудаас нэр дэвшигчдийн 20 хүртэл хувь эмэгтэйчүүд байх талаар хуульчилж өгөөд буй. Намууд нэр дэвшигчдээ тодруулахаар ид ажиллаж буй энэ үед “Эмэгтэйчүүдийн улс төрийн оролцоог нэмэгдүүлэх арга замыг тодорхойлох нь” сэдэвт Азийн бүсийн бага хурал Монголд анх удаа болох гэж байна. Уг бага хурлыг “Чингис” зочид буудалд дөрөвдүгээр сарын 3-4-ны өдрүүдэд  хийх юм.  Олон улсын бага хурлыг Монгол Улсын Засгийн газар, Жендэрийн үндэсний хороо, НҮБХХ-ийн Ази, Номхон далайн бүсийн төв, Монгол Улс дахь НҮБХХ-ийн Суурин төлөөлөгчийн газар хамтран зохион байгуулах аж.

Азийн бүсийн бага хуралд  Монгол Улсаас 30 гаруй, гадаадын орнуудаас 50 гаруй төлөөлөгч оролцуулахаар урьдчилан мэдүүлэг авсан байна. БНХАУ, БНСУ, Вьетнам, Индонез, Камбож, Киргиз, Лаос, Мъянмар, Филиппин, Шинэ Гвиней, Тайланд, Тимор Лесте  зэрэг 20 гаруй орны парламентын гишүүн, Засгийн газар, иргэний нийгмийн төлөөлөл, НҮБХХ-ийн ажилтнууд, экспертүүд  оролцохоо мэдэгджээ.

Өнөөдрийн байдлаар зарим орны  үндэсний парламентад эмэгтэйчүүдийн эзэлдэг хувийг авч үзвэл Балба 33,2, Афганистан 27,7, Вьетнам 25,8, БНАЛАУ  25,2, Пакистан  22,2, Филиппин  21,4, Бангладеш 18,6, Тайланд  13,3, Энэтхэг 10,8, Бутан 8,5, Малдив 6,5, Шри Ланка 5,8 хувьтай байгаа бол Монгол Улсын Их Хуралд эмэгтэй гишүүдийн эзлэх хувь 3,9  байгаа нь бүс нутагтаа сүүл мушгисан үзүүлэлт юм.