Хятадын зураач, барималч, ардчилсан үзэлт уран бүтээлч Ай Вэй Вэйд тус улсын татварын албанаас татвараас зайлсхийсэн хэрэгт буруутган 15 сая юанийн торгууль төлөхийг шаардсан. Гэвч энэ торгуулийг албан ёсны шүүхийн шийдвэр болгон баталгаажуулсан ямар ч шүүх хурал болохгүй гэдгийг тус улсын эрх баригчид саяхан мэдээлжээ. Харин торгууль ногдуулсан тухай шийдвэрийг бичгээр хүргүүлэх гэнэ.

Ай Вэй Вэй “Ямар улс аливаа хуулийн шийдвэрийг шүүх хуралдаангүйгээр гаргаж байсан юм бэ. Тэд зүгээр л ичгүүрт унахаас сэргийлж байгаа юм” хэмээн “Ройтерс” агентлагийн сурвалжлагчид ярив. Өнгөрсөн онд түүнийг эдийн засгийн гэмт хэрэгт сэжиглэн 81 хоног хорьж саатуулсан. Гэхдээ өнөөг хүртэл чухам ямар хэрэгт гэдгээ албан ёсоор огт танилцуулаагүй бөгөөд шалгалт үргэлжилсээр байгаа гэдгийг л сануулсан байна. Түүнийг Бээжингээс гарч явахыг хориглосон байгаа.