Монголын Физикийн олимпиадын улсын хороо, Нийслэлийн боловсролын газар, Хо Ши Миний нэрэмжит, улсын тэргүүний 14 дүгээр дунд сургууль, “Үүрэг трейд холдинг” компани хамтран зохион байгуулсан Нийслэлийн физикийн олимпиадын дүн өчигдөр гарлаа. Монгол Улсын гавьат багш Б.Оргойн нэрэмжит, 17 дахь жилдээ зохион байгуулсан тус олимпиад нийслэлийн есөн дүүрэг, Дархан-Уул аймаг зэрэг ерөнхий боловсролын дунд сургуулийн 400 орчим хүүхэд оролцож, Сант сургуулийн сурагч Л.Оюунтөгс, нэгдүгээр дунд сургуулийн сурагч  М.Баттүшиг, мөн сургуулийн сурагч  Б.Төрхүү, Б.Бат-Амгалан  Ч.Энхтул нар түрүүлж алтан медаль хүртсэн байна. Зохион байгуулагчид нийслэлд түрүүлсэн сурагчдыг ирэх тавдугаар сард Энэтхэг улсад болох Азийн олимпиадад оролцуулах ажлыг өнөөдрөөс эхлэн зохион байгуулах аж. Монгол Улсын гавьат багш Б.Оргой нь 1973 онд анх удаа физикийн гүнзгийрүүлсэн сургалтыг Монгол Улсад зохион байгуулсан бөгөөд түүний шавь нар дотроос физикийн олон багш нар төрсөн төдийгүй Монгол Улсын анхны Ерөнхийлөгч П.Очирбат, Ерөнхий сайд Сү.Батболд, УИХ-ын гишүүн асан Б.Мөнхтуяа, Монгол банкны ерөнхийлөгч Ц.Үнэнбат нарт багшилж байсан аж. Энэ удаагийн олимпиадыг Б.Оргой багшийн хүү О.Баяр ивээн тэтгэжээ. Олимпиадад оролцогч багш, сурагчдын шагналын санг нэмэгдүүлсэнээр илүү олон хүүхдийг хамруулах боломж нэмэгдсэн хэмээн зохион байгуулагчид ярьж байна. Энэ талаар тус олимпиадыг зохион байгуулахад гол үүрэг гүйцэтгэсэн О.Баяраас дараах асуултад хариулт авсан юм.

-Энэ удаагийн олимпиадыг онцлог юу байв. Ер нь Монгол хүүхдүүдийн физикийн мэдлэг тив, дэлхийд ямар түвшинд байгаа гэж үзэж байна вэ?

-Улсын физикийн олимпиад жилээс жилд өргөжиж байна. Тэр дундаа хотын олимпиад нэлээн өргөн хүрээг хамардаг болсон. Энэ жил бид олон хүүхдийг хамруулах үүднээс бас тэднийхээ нийгмийн идэвхийг дээшлүүлэх зорилгоор шагналын сангаа нэмэгдүүлсэн. Олимпиадад түрүүлсэн хүүхдүүдийг маань цаашдаа улсын хэмжээний Ази тивийн, дэлхийн хэмжээний уралдаанууд хүлээж байна. Манай монгол хүүхдүүд физикийн олон улсын олимпиадад амжилттай оролцдог уламжлалтай. Жилийн жилд хүрэл, мөнгөн медаль хүртэж ирдэг. Харин энэ жил зохион байгуулагчдын зүгээс Азид болон дэлхийд өрсөлдөх хүүхдүүдийнхээ медалийн өнгийг хувиргаж алт болгох зорилго тавьсан. Туршлагаас харахад олон улсын олимпиадад амжилттай оролцсон хүүхдүүд их дээд сургуулийн нэг хоёрдугаар курсээс бүгдээрээ гадаадад суралцахаар явдаг. Япон болон АНУ-ын их дээд сургуулиудад маш амжилттай суралцаж байгаа. Олимпиад өөрөө хүүхдүүдийн оюун ухаан, авьяас чадварыг хөгжүүлдэг. Тийм учраас аавынхаа нэрэмжит хотын олимпиадыг ивээн тэтгэж хүүхэд залуустаа урам өгье гэдэг үүднээс энэ ажлыг зохион байгуулахдаа дуртай байдаг. Ирэх тавдугаар сард Энэтгэх улсад Азийн физикийн олимпиад болно. Үүнд улсын олимпиадуудын нийлбэр оноогоор тэргүүн байр эзэлсэн хүүхдүүд оролцоно. Энд хотын олимпиадад тэргүүлсэн хүүхдүүд ч олноороо хамрагдана. Өнөөдрийн шилдэгүүд маань Азийн олимпиадад оролцох эрхээ авч чадна гэж бодож байна.