Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, Эргүүл хамгаалалтын газрын дарга асан, цагдаагийн хурандаа Ш.Батсүх, Нийслэлийн цагдаагийн газрын дарга асан, цагдаагийн хурандаа О.Зоригт, тус газрын Хэв журмын хэлтсийн дарга асан, цагдаагийн дэд хурандаа Г.Ганбаатар нарыг шүүх хурал үргэлжилж байна.

Дөнгөж сая шүүгдэгчдийн өмгөөлөгч нар шүүх хуралдаанд оролцохгүй гэдгээ мэдэгдэн хурлаас гарч ирлээ.

Генерал Ч.Амарболдын өмгөөлөгч О.Алтангэрэл “Энэ бол улстөрийн захиалгат жүжиг болж байна. Өмгөөлөгчдийн гаргасан хүсэлтийг хүлээж авалгүйгээр хүчээр шүүх хурлыг явуулж байна. Шүүх бидний үйлчлүүлэгчээ өмгөөлөх боломжийг хаан боогдуулж, хууль зөрчсөн үйлдэл удаа дараа гаргаж байна. Бид энэ жүжигт оролцож, алиа салбадай болох шаардлага алга” гэв.

Шүүх хуралдаан хойшлох эсэх талаар асуухад “Шүүгдэгч өмгөөлөгч авах эрхтэй. Энэ эрхийг шүүх хангах үүрэгтэй. Өмгөөлөгчид нь татгалзчихаад байхад шүүх хуралдааныг үргэлжлүүлэх боломжгүй. Гэхдээ шүүх бүрэлдэхүүн ямар шийдвэр гаргахыг мэдэхгүй байна” гэлээ.