3-р сарын 19-ний өдөр Дархан-Уул аймгийн Стандартчилал хэмжил зүйн хэлтэст нэгэн иргэн хүнсний хэрэгцээндээ худалдан авсан будаанаас нь шавьж илэрсэн тухай гомдол ирүүлжээ. Үүний дагуу тус хэлтсийн Сорилтын лабораторийн шинжээч нар буудайнд шинжилгээ хийхэд цагаан будаанд Монгол улсад гадаад хорио цээртэй шавьж болох цагаан будааны шөвгөр хошуут цох их хэмжээгээр байгааг тогтоосон байна. Дархан-Уул аймгийн томоохон худалдааны төвд хамгийн үнэтэй зарагдаж байсан энэхүү цагаан будаа Солонгосын дээд зэргийн чанартай цагаан будаа гэсэн. Харамсалтай нь халдварт болон халдварт бус өвчнийг нэг бүс нутгаас нөгөө бүс нутагт тархаах аюултай шавьж энэхүү будаанд үржсээр байна. Өмнө нь БНХАУ-аас орж ирсэн хэд хэдэн төрлийн цагаан будаанаас шавьж илэрч байсан тохиолдол гарч байсан. Иргэд ч сайн чанартай, эрүүл мэндэд тустай гэж бодоод аль болох үнэтэй, хятад улсаас өөр улсаас экспортлогдсон будааг сонгон, хүнсний хэрэгцээндээ хэрэглэхийг зорих болсон. Харин үнэтэй, Солонгос будаанд хүртэл гадаад хилийн хорио цээртэй шавьж илэрсэн байна.

5 кг-аар савлагдсан Солонгос цагаан будаа 20 мянга орчим төгрөгөөр худалдаалагдсан. Худалдааны төвийн холбогдох албанаас мэдэгдэж байгаагаар энэ будаа зарагдаад дууссан. Ганцхан будааг МХГ-ын байцаагчид авч явсан. Өөр ийм будаа байхгүй гэсэн юм. Хүнсний аюулгүй байдал алдагдаад байгааг ганц энэ жишээнээс харж болно. Өмнө нь зөвхөн Хятадын бараа, бүтээгдэхүүн муу, чанаргүй гэгддэг байсан бол одоо хамгийн үнэтэй худалдаалагдаж байгаа хүнсний бүтээгдэхүүн хүртэл чанарын шаардлага хангахаа больж байна. Баталгаагүй газраас биш, Дархандаа л хамгийн томд тооцогдох худалдааны төвөөр үйлчлүүлж, найдвартай хүнс хэрэглэж байна гэж бодож байгаа иргэд, хүнсэндээ хэрэглэж байгаа бүтээгдэхүүнүүдээ эргэн нэг харахад илүүдэхгүй болжээ.