Тэнэглэлийг хүн бүр өөр, өөрийнхөөрөө дүгнэж бас тайлбарлах байх. Ингэхдээ дотроо хэн нэг найзыгаа, ахыгаа, эгчийгээ, магадгүй өөрийгөө ч төсөөлж байж болох юм. Харин тэнэглэлийг утгаар нь харуулж буй үйлдлийг Ардчилсан намынх­наас харж болохоор байна. Өнгөрсөн сонгуулийн дараа Ардын нам, Ардчилсан на­мынхан стандарт бус Зас­гийн газрыг байгуулан хам­тарч ажиллахаа тунхаглан хун­да­га харшуулж байсан. Ингэс­нийхээ үр дүнд сайн, муугаар хэлүүлэн байж гурван жи­лийг үдсэн. Гэтэл нэг өдөр Ард­чилсан намынхан “Бид хамт­рахаа болилоо” хэмээн гарч одоход Ардын намын удирд­лагууд “Ханилж яваад нөх­рөө гэдэг дээ” гэсээр хо­­цорсон. Энэ үйл явдлын тухай мэдээлсэн сонины хуу­дас шарлаж амжаагүй байхад Ардчилсан намынхан Зас­гийн газарт итгэл үзүүлэх эсэх асуудлыг тавихаа мэдэгд­лээ. Ийн хэлэх болсны гол учир нь “Ерөнхий сайд С.Бат­болдод “Орон нутгийн хур­лын сонгуулийг УИХ-ын сонгуультай хамт явуулах бэлт­гэлийг хангах ёстой” гэ­сэн шаардлага хүргүүлсэн. Ха­рин үүнийх нь хариуд “Зас­гийн газар сонгуулийг зохион байгуулахад оролцох нь хууль зөрчсөн үйлдэл болно” гэсэнтэй холбоотой юм. Тэд хамтарсны эцэст маргалдсан ч гэсэн УИХ-ын сонгуулийн тухай хуулийг баталж чадсан. Гэтэл хамтрахаа болимогцоо Орон нутгийн хурлын сон­гуулийн тухай хуульд нэмэлт өөрчлөлт оруулах асуудлыг гацаах болов. Уг нь Ардчилсан намынхан хамтарсан Засгийн газарт байхдаа “Бид чадлаа. Сайн байлаа” гээд л ярьдаг байсан шүү дээ. Одоо бо­лохоор “Засгийн газар муу байна. Ажлаа хийж чаддаггүй. Итгэл хүлээлгэх эсэх тухай ярина” гэх юм. Ардчилсан намынхан засагт байхаар бүх зүйл ok болдог. Харин гараад явчихаар нь бүгд авах юм байхгүй муу болдог хууль Монголд байхгүй л гэлтэй. Эсвэл тэд өөрсдийгөө хэнээс ч илүү мундаг гээд бодчихсон юм болов уу.

Хэрэв тэгээгүй юм бол Ард­чилсан намынхан засагт байхдаа худал ярьсан байж таарах нь. Хамтарсан хэрнээ юу ч хийгээгүй болохоороо намын бүлгээрээ ху­ралдаж байгаад “Хэвлэлийнхэнд Засгийн газар сайн ажиллаж байгаа шүү гэж хэлээд байгаарай” гэсэн юм уу. Тэгсэн бол бид Ардчилсан намынхнаас ам асуух хэрэгтэй болж байгаа биз. “Хуйвалдан” байж ард түмэндээ худал хэлсэн улстөрчдийг өөрөөр бид яах билээ. Хамтарсан Засгийн газарт байсан Ардчилсан намын сайд нар хамтарсны “ид шид”-ийг магтаж байв. Тухайлбал,

-УИХ-ын 2008 оны сонгуулийн дараа долоодугаар сарын 1-ний  үймээн болж, таван хүний амь эрсэдсэн. Үүний дараа Монгол Улс цаашид сөргөлдөөнтэй байд­лаар явах юм уу, яах юм бэ гэсэн асуултын тэмдэг гарч ирсэн. Энэ үед Ардчилсан нам ухаалаг шийд­вэр гаргаж, хамтарсан Засгийн газарт орсон юм. Энэ шийдвэрийг гаргаад гурван жил, дөрвөн сар гаруйн ху­гацаа өнгөрлөө. Бид хам­тарснаараа тодорхой ажлыг хийж чадлаа. Ту­хайлбал, хамтарснаараа улс төрийн тогтвортой байдлыг хад­галсан. Мөн дэлхий нийтэд гам­шиг авчирсан эдийн засгийн хямралыг харьцангуй гарз хохирол бага­тайгаар давлаа. Ардчилсан нам хамтарсан Засгийн газарт орж ажил­ласнаараа өөрт ногдсон түүхэн үүргээ хариуцлагатай, нэр төртэй биелүүлсэн гэж үзэж байна. “Улс төрийн тойм” сонин 2012.01.06

-Хамтарсан Засгийн газрын буянд өнгөрсөн гурван жил, дөрвөн сарын хугацаанд улс төр маш тогтвортой байлаа. Улс төрийн тогтвортой бай­дал нь эргээд салбарын ажлыг урагш­луулдаг. Эрүүл мэндийн сал­барт юу хийсэн юм гэж хүмүүс намайг янз бүрээр дүгнэж байгаа байх. Харин миний хийсэн ажлын үр дүн өнөөдөр гарахгүй. Тодорхой хугацааны дараа мэдрэгдэх болно. “Улс төрийн тойм”сонин 2012.01.30

-УИХ-аас баталсан шийдвэр, Зас­­гийн газрыг байгуулахдаа бо­ловс­руулсан мөрийн хөтөлбөрийг хэрэг­жүүлэхийн тулд УИХ Засгийн газ­рыг томилдог. Засгийн газрын ги­шүүн энэ зорилтыг биелүүлэхийн тө­лөө өөрөөсөө хамаарах бүхнийг хийх ёстой. Тиймээс өөрийнхөө хийж чадахгүй, болж бүтэхгүй байгаа зүй­лийг хүнд нялзааж болохгүй.  Хам­тарсан Засгийн газар байгуулсан тул­даа Оюутолгойн гэрээг баталж чадсан шүү дээ. Үүний үр дүнд эдийн засаг өссөн. Монгол Улсын га­даад дахь нэр хүнд өссөн. Энэ бол Оюутолгойн гэрээг байгуулсны гавьяа. Дээр нь Монголын талд өгөх нийт ашиг нь 50 хувиас илүү бай­гаа. “Улс төрийн тойм”сонин 2012.01.12

-Сангийн сайдаар ажиллаж байсан эхний үе маш хэцүү байсан. Дэлхий нийтийг хамарсан эдийн засгийн хямрал нүүрлэсэн байсан. Гэхдээ бид хамтарснаараа үүнийг маш богино хугацаанд даван туулж чадсан. Тэр битгий хэл бид Ази, Номхон далайн орнуудын хувьд Олон улсын валютын сангийн хөтөлбөрийг анх удаа амжилттай хэрэгжүүлсэн улс болсон. Маш олон хууль тогтоомжийг өөрчилж, амжилттай ажилласан учир 2010, 2011 он бидний хувьд өндөр өсөлтийн жил болж чадлаа. Үүний ач тусаар гацсан байсан Оюутолгойн гэрээг удирдаж, батлуулж, гэрээг нь хийх үндсэн үүрэг надад ногдсон. Энэ гэрээ монголчуудын ирээдүйг то­дорхойлох гол зүйл болно. Оюу­толгой төслийн шууд болон шууд бус нөлөөг мөнгөөр хэмжих арга­гүй. Энэ гэрээний хамгийн да­вуу тал нь Монголын Засгийн газ­раас нэг ч төгрөгний хөрөнгө оруу­лалт хийгдэлгүйгээр бүх бүтээн бай­гуу­лалт нь явагдаж, 59 хувийн ашгийг болсон. Бид гэрээгээ олон улсын байгууллагуудаар дүгнүүлэхэд энэ гэрээ Засгийн газар талдаа маш ашиг­тай болсон гэсэн судалгааны дүн­гүүд гарсан байдаг. Шууд.мн сайт 2012.01.16

Ардчилсан намынхны хамтарсан засгийг магтсан эдгээр үг өнөөдөр 360 градус эргэжээ. Хаяад явсан Ардчилсан намынхны орон зайг Ардын намынхан богино хугацаанд нөхөж ажиллаж буй. Ардын намын шинэ сайд нар хуучин сайд нараас дутах зүйл байхгүй. Үүнийг нь сайд болсныхоо дараа хийсэн ажлаас нь харж болно. Ард түмэн ч харж, дүгнэж байгаа байх. Гагцхүү Ардчилсан намынхан “Манай намын сайд нараас илүү хүн хаана ч байхгүй” гэдэгт бат итгэлтэй байгаа бололтой. Та бүхний энэ тэнэглэлийг ядарсан улс төр гэхээс өөр хэлэх ч үг алга даа.