МҮЭХ-ноос УИХ-ын 2012 оны ээлжит сонгуулиар улс төрийн намуудтай гэрээ байгуулан хамтран ажиллана хэмээн мэдэгдэж байсны дагуу ИЗНН-тай “МҮЭХ-ны санал-Хөдөлмөрчдийн нийгмийн захиалга” баримт бичгийг байгуулж, талууд өнөөдөр гарын үсэг зурлаа. Гарын үсэг зурах ёслолд ИЗНН-ын гурван дарга болох УИХ-ын гишүүн С.Оюун, Д.Энхбат, МҮХАҮТ-ын дарга С.Дэмбэрэл нар болон МҮЭХ-ны ерөнхийлөгч С.Ганбаатар, ИЗНН-ын дэмжигч, УИХ-ын гишүүн З.Алтай нар оролцсон юм. Тэд байгуулсан хамтран ажиллах гэрээгээ газар дээр нь нотариатаар гэрчлүүлж, баталгаажуулсан нь сонгуульд оролцох явц болон сонгуулийн дараа бие биенээсээ хариуцлага нэхэж, хэрэв гэрээгээ биелүүлэхгүй бол огцруулах хүртэл арга хэмжээ авах зорилготой юм байна.

Баримт бичигт эдийн засгийн хөгжил, хөдөлмөр эрхлэлт, цалин хөлс, нийгмийн хамгаалал, хүний хөгжил, бүс нутгийн хөгжил, нийгмийн түншлэлийг дэмжих гэх мэт олон арван чиглэлийг тусгасан байна. МҮЭ-ийн гишүүд, дэмжигчид гэрээлэгч тал болох улс төрийн намаас гэрээний хэрэгжилтийг шаардах, сонгуульд олонх суудал авч Засгийн газар байгуулах тохиолдолд хөдөлмөрчдийн захиалгыг мөрийн хөтөлбөрийнхөө үндэс болгох гэх мэт болзлуудыг тусгажээ. МҮЭ-ийн ерөнхийлөгч С.Ганбаатар “Гадаадын зарим улсад ҮЭ-ийн холбоо нь сонгуулийн үеэр зөвхөн нэг намтай гэрээ байгуулдаг. Харин бид бүх нам хүчинтэй хамтран ажиллах уриалга гаргаж байгаа. Гэхдээ тэднийг шахаж шаардахгүй. Харин аль нэг нам татгалзвал олон нийтэд мэдээлнэ. Энэ бүхний эхлэл нь ИЗ-НН боллоо” гэлээ.